२४ घण्टामा १३६ जना संक्रमित कोरोनामुक्त

काठमाडौं, ८ फागुन । पछिल्लो २४ घण्टामा नेपालमा १३६ जना संक्रमित कोरोनामुक्त भएका छन् ।

यो सँगै नेपालमा कोरोना भाइरसको संक्रमण निको हुनेको संख्या २ लाख ६९ हजार ७५५ जना पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा कोरोना भाइरसका ८८ जना नयाँ संक्रमित थप भएका छन् । बितेको २४ घण्टामा देशभर २ हजार ४८ जनाको स्वाब परीक्षण गर्दा उक्त संख्यामा संक्रमित पुष्टि भएको हो । यो सँगै नेपालमा कोरोना भाइरसबाट संक्रमित हुनेको संख्या २ लाख ७३ हजार ३५१ जना पुगेको छ ।

यस्तै पछिल्लो २४ घण्टामा देशभर कोही पनि संक्रमितको मृत्यु नभएको मन्त्रालयले जनाएको छ । शुक्रबारसम्मको विवरण अनुसार हालसम्म नेपालमा कोरोना भाइरसको संक्रमणबाट मृत्यु हुनेको संख्या २ हजार ६१ जना पुगेको छ ।

हाल देशभर सक्रिय संक्रमितको संख्या १ हजार ५३५ छ ।

मन्त्रालयका अनुसार हालसम्म नेपालमा २१ लाख ३६ हजार ३०९ जनाको पीसीआर विधिबाट स्वाब परीक्षण गरिएको छ भने अहिले १ हजार ५३५ जना आइसोलेसन र ७१ जना क्वारेन्टिनमा छन् ।