नयाँ दिल्ली, ११ माघ । छिमेकी देश भारतमा आज एक १९ वर्षीया किशोरी उत्तराखण्ड राज्यको मुख्यमन्त्री बन्ने भएकी छिन् ।
हरिद्वार जिल्लाको दौलतपुर गाउँकी सृष्टि गोस्वामीलाई उत्तराखण्ड सरकारले एक दिनका लागि मुख्यमन्त्री बनाउन लागेको हो । आज २४ जनवरीमा राष्ट्रिय बालिका दिवसको अवसरमा उनी मुख्यमन्त्री बन्न लागेकी हुन् ।
प्रतिकात्मक भए पनि उनी उत्तराखण्डको पहिलो महिला मुख्यमन्त्री हुने छिन् । उनी बाल विधानसभामा मुख्यमन्त्रीको रुपमा सहभागी हुनेछिन् र सरकारका अलगअलग विभागले आयोजना गर्ने कार्यक्रममा पनि सहभागी हुने बताइएको छ ।
सो अवसरमा विभागका अधिकारीहरुले आफ्नो कामबारे जानकारी गराउने छन् भने त्यसमा सृष्टिले सुझाव दिनेछिन् । उत्तराखण्डका मुख्यमन्त्री त्रिवेन्द्र सिंह रावतसमेत उक्त कार्यक्रममा सहभागी हुने छन् ।
उत्तराखण्ड विधानसभा भवनको एक सभाहलमा उक्त कार्यक्रम भारतीय समयअनुसार मध्याह्न १२ बजेदेखि ३ बजेसम्म हुने छ । एजेन्सी
प्रतिक्रिया