काठमाडौं, १० पुस । प्रधानमन्त्री केपी शर्मा ओलीले संसद विघटन गरी नयाँ निर्वाचनको मिति घोषणा गरेसँगै त्यसको विरोधमा कतिपय राजनीतिक दलहरुले विरोध प्रदर्शन शुरू गरेका छन् ।
निर्वाचनमा जाने प्रधानमन्त्रीको कदम आन्तरिक रुपमा स्वागतयोग्य भए पनि केही राजनीतिक मुद्दाहरुका कारण प्रमुख प्रतिपक्ष दलसहितका राजनीतिक शक्तिहरु विरोधस्वरुप प्रदर्शनमा उत्रिएका छन् ।
तर, विश्वव्यापी कोरोना भाइरसको त्रास कम नभइसकेको र थप नयाँ प्रकारको संक्रमणको फैलावट भइरहेको अवस्थामा यसले महामारीलाई बल पुर्याएको भन्दै गृह मन्त्रालयको ध्यानाकर्षण भएको छ ।
प्रदर्शनका क्रममा हुने सम्भावित घटना तथा दुर्घटना र महामारी फैलिन नदिनका लागि गृह मन्त्रालयले थप सुरक्षा सतर्कता बढाएको बताएको छ ।
‘चिसोको यो मौसममा कोभिड–१९ संक्रमणको नयाँ प्रकारका कारण अहिले भइरहेको सरकारको विरोध र समर्थनमा भएका प्रदर्शनहरुले थप जोखिम बढाएको छ’, गृह मन्त्रालयका सचिव चक्रबहादुर बुढा भन्छन्, ‘जोखिमबाट जोगिन आफ्ना प्रदर्शनहरु सोही अनुसार व्यवस्थापन गर्न मन्त्रालय आग्रह गर्दछ ।’
यसैबीच सरकारले सात वटै प्रदेश प्रमुखहरुलाई भर्चुअल माध्यमबाट सुरक्षा व्यवस्था कडा पार्न निर्देशन दिएको बताइएको छ । खासगरी सुरक्षा चुनौती बढी भएका क्षेत्रहरुमा प्रहरीले आफ्नो सक्रियता बढाइसकेको नेपाल प्रहरीका प्रवक्ता बसन्तबहादुर कुँवरले जानकारी दिएका छन् ।
स्वास्थ्य सुरक्षाको जोखिमलाई न्यूनीकरण गर्न प्रहरीले प्रदर्शनहरुको व्यवस्थापन गर्दा झडप तथा अप्रिय घटनाहरु हुन नदिन प्रहरी सचेत रहेको पनि उनको भनाइ छ ।
प्रतिक्रिया