संघीयताले राष्ट्रिय एकता र अखण्डतामाथि गम्भीर खतरा उत्पन्न गर्यो : जनमोर्चा

‘हामीले जति चाँडो संघीयता खारेज गर्दछौं, त्यति देश र जनताको कल्याण हुने छ’

दैनिक नेपाल २०७७ मंसिर १६ गते १३:०५

काठमाडौं, १६ मंसिर । राष्ट्रिय जनमोर्चाले नेपालमा संघीय व्यवस्था लागू भएपछि देशको राष्ट्रिय एकता र अखण्डतामाथि गम्भीर खतरा उत्पन्न भएको बताएको छ ।

मंगलबार एक प्रेस वक्तव्य जारी गर्दै सो पार्टीले नेपालका लागि संघीय शासन प्रणाली उपयुक्त व्यवस्था नभएको समेत स्पष्ट पारेको छ । ‘संघीय शासन प्रणाली नेपालको लागि सही व्यवस्था होइन । शुरुका दिनमा संघीयताबारे भ्रमहरु थिए । आज व्यवहारमै संघीय शासन प्रणाली बेठिक मात्र होइन, यसका कैयन दुष्परिणामहरु देखिएका छन्’, वक्तव्यमा भनिएको छ ।

संघीयताले देशको राष्ट्रिय एकता र अखण्डतामाथि गम्भीर खतरा उत्पन्न गरेको बताउँदै जनमोर्चाले अनावश्यक र अनुचित संघीय शासन प्रणाली चलाउन ठूलो धनराशी खर्च गर्न परिरहेको बताएको छ । ‘संघीयताको खर्च चलाउन विकाश निर्माणको खर्च कटौती भएको छ र देशका विकास निर्माण कुण्ठित हुन पुगेका छन् । हामीले अहिले नै संघीय प्रणाली खारेज गरेर यसमा हुने गरेको खर्च कोरोना भाइरसको रोकथाम र उपचारमा खर्च गर्न माग गरेका थियौँ । यो डेढ दशकको समयमा संघीय प्रणालीको कुनै आवश्यकता र औचित्य देखिएन ।’

संघीयताले शासन प्रणालीलाई झण्झटिलो बनाएको निष्कर्ष जनमोर्चाको छ । अब जनस्तरबाटै संघीयताको विरोधमा आवाजहरु उठेको भन्दै सो पार्टीले यो प्रणाली खारेज गर्न संसदमा संविधान संशोधन प्रस्ताव नै राखेको समेत बताएको छ ।

‘काम गर्ने दौरानमा व्यक्ति वा राजनीतिक दलबाट पनि गल्ती कमजोरी हुन्छन् । त्यस्ता गल्ती कमजोरीलाई ढाकछोप गर्ने होइन कि तिनलाई सुधार गर्नु नै महानता हुन्छ’, वक्तव्यमा लेखिएको छ, ‘हामीले जतिसक्यो चाँडो संघीयता खारेज गर्दछौं, त्यति देश र जनताको कल्याण हुने छ ।’