जुम्ला, २ मंसिर । जुम्ला जिल्लाको हिमा गाउँपालिका–३ मोफ्ला गाउँकी १६ वर्षीया बालिका बबिता रोकायाको हत्यालाई कारबाहीका लागि दवाव दिन शुक्रबार प्रदर्शन भएको छ ।
सिंजाबाट जुम्ला आएका पीडितले शुक्रबार दोषीलाई कारबाहीको मागसहित प्रदर्शन गरेका छन् । प्रदर्शनको क्रममा प्रहरीले लाठी चार्ज समेत भएको थियो ।
जुलुसलाई तितरवितर पार्न प्रहरीले लाठिचार्ज र अश्रुग्यास प्रहार गर्दा दुई पक्ष बीच झडप समेत भएको छ । झडपमा ६ जना घाइते भएका छन् ।
घाइते हुनेमा खाम्बा रोकाया, हरिभक्त कठायत र सुवि कठायत रहेका छन् । सशस्त्र प्रहरीका उदय खत्री र राजबहादुर रावत पनि घाइते भएका छन् । नेपाल प्रहरीका निदेश रोकाया घाइते भएका छन् ।
बालिका हत्या आरोपमा हिमा गाउँपालिका– ३ मोफ्ला गाउँका १९ वर्षीय करबहादुर भण्डारी र ३७ वर्षीय रामचन्द्र डाँगी पक्राउ परेका छन ।
पीडित पक्षले घटनाको मुख्य योजनाकारलाई प्रहरीले मुद्दा कमजोर बनाएर धरौटीमा रिहा गरेको आरोपसहित आन्दोलित भएको जनाएको छ ।
जुम्लाका प्रहरी प्रमुख (डीएसपी) माधवप्रसाद काफ्लेकाले २०७७ असोज १९ गतेको राति घरबाट बेपत्ता भएकी किशोरी कात्तिक १ गते हिमा–१ पागरपालीस्थित हिमा नदीको छेउमा मृत फेला परेको जानकारी दिए ।