सिप्रदी ट्रेडिङ र सिप्रदीयन संस्थाद्वारा ११ स्थानमा यात्रु सहायता कक्ष सञ्चालन

दैनिक नेपाल २०७७ कार्तिक ३ गते १२:५८

काठमाडौं, ३ कात्तिक । काठमाडौं उपत्यकाका विभिन्न ११ स्थानमा यात्रु सहायता कक्ष सञ्चालन भइरहेका छन् ।

टाटा गाडीको नेपालको आधिकारिक विक्रेता सिप्रदी ट्रेडिङ तथा सिप्रदीयन सहायता संस्थाले ट्राफिक प्रहरी, नाडा र यातायात व्यवस्था विभागको सहकार्यमा उपत्यकाका विभिन्न ११ ठाउँमा यात्रु सहायता कक्ष सञ्चालन गरेको हो ।

चाडपर्व र अहिलेको कोरोना भाइरस सङ्क्रमणको अवस्थालाई दृष्टिगत गर्दै बल्खु, गोंगबु बसपार्क, फर्पिङ, गौशाला, कलंकी, कोटेश्वर, माछापोखरी, सुन्धारा, पुरानो बसपार्क, नागढुंगा र जगातीमा यात्रु सहायता कक्ष सुरु गरेको कम्पनीले जनाएको छ ।

कम्पनीले सहायता कक्षमा बस्ने ट्राफिक प्रहरी र कर्मचारीलाई स्यानिटाइजर, मास्क, फेस भाइजर र डिस्इन्फेक्ट समेत दिएको छ ।

दशैँमा काठमाडौं उपत्यका भित्रिने र बाहिरिने यात्रुका लागि यात्रामा सहज वातावरण बनाउन र उनीहरुलाई परेका समस्या छिटो समाधान गर्न सहायता कक्ष स्थापना गरिएको सिप्रदीले जनाएको छ ।

यात्रुले टिकट बुकिङ्ग गर्न समस्या भएमा, तोकेको मापदण्डभन्दा बढी भाडा लिएमा वा बस चढ्ने बेलामा समस्या भए सिधै सहायता कक्षमा सम्पर्क गर्न सक्छन् ।

उनीहरुले ट्राफिक प्रहरीको पैसा नलाग्ने टेलिफोन नम्बर १०३ मा फोन गरेर पनि गुनासो टिपाउन सक्ने छन् । यात्रुले टिपाएका सबै गुनासो सुनेर सम्बन्धित व्यक्ति तथा कार्यालयलाई कारबाही गरिने महानगरीय ट्राफिक प्रहरी महाशाखाका प्रवक्ता प्रहरी उपरीक्षक रामेश्वरप्रसाद यादवले जानकारी दिए ।

यात्रु सहायता कक्षमा टिकट दरको बारेमा जानकारी दिइन्छ । यस्तै कोरोना भाइरस सङ्क्रमणको जोखिम कम गर्न अपनाउनुपर्ने सुरक्षा सावधानीका उपाय जस्ता सूचनामुलक सन्देश पनि यस कक्षबाट दिइने सिप्रदीले जनाएको छ ।