काठमाडौं, २२ असोज । जनता समाजवादी पार्टीका नेता एवं पूर्वउपप्रधानमन्त्री उपेन्द्र यादवका निजी सचिव (पीए) पक्राउ परेका छन् ।
आफ्नै पत्नीले गम्भीर अभियोगसहित प्रहरीमा उजुरी दिएपछि यादवका पीए महेशकुमार तमौली (महेश चौरसिया) पक्राउ परेका हुन् । उनकी पत्नीको किटानी जाहेरीको आधारमा पक्राउ गरिएको प्रहरीले बताएको छ ।
पीए चौरसियाविरुद्ध उनकै पत्नीले विद्युतीय अपराध (साइबर अपराध) को उजुरी दिएकी छिन् । आफूविरुद्ध गम्भीर अपराध गरेको भन्दै पत्नीले उजुरी दिएपछि काठमाडौं प्रहरी परिसरले चौरसियालाई असोज ८ गते नियन्त्रणमा लिएको बताइएको छ ।
उनलाई सुरुमा ५ दिन म्याद थप गरिएको थियो । असोज १२ मा पुनः १० दिन म्याद थप गरी अनुसन्धान भइरहेको काठमाडौं प्रहरी परिसरका प्रवक्ता एसपी सोमेन्द्रसिंह राठौरले जानकारी दिए ।
राठौरका अनुसार चौरसियाले श्रीमतीलाई धम्कीपूर्ण र गालीगलौजयुक्त म्यासेज पठाएको र सामाजिक सञ्जाल फेसबुकमा पोष्ट गरेको उजुरी परेपछि नियन्त्रणमा लिइएको हो ।
चौरसियाविरुद्ध परेको उजुरीमा अनुसन्धान भइरहेको प्रहरीले बताएको छ । चौरसियाले श्रीमतीलाई फेसबुक र म्यासेन्जरमा गालीगलौज र धम्की दिएको देखिएको छ । बाँके प्रहरीमा उजुरी परेको र सोही उजुरीका आधारमा उनलाई पक्राउ गरिएको प्रहरीले बताएको छ ।
प्रतिक्रिया