प्रतिकूलताका बावजूत आर्थिक परिसूचक सकारात्मक : अर्थमन्त्री खतिवडा

काठमाडौं, ५ भदौ । अर्थमन्त्री डा. युवराज खतिवडा र विश्व बैंकका दक्षिण एशिया क्षेत्रका उपाध्यक्ष हार्टविग सेफरबीच कोरोना भाइरसले नेपालको अर्थतन्त्र, स्वास्थ्य र जनजीवनमा पारेको असर तथा संक्रमण रोकथामका प्रयासका विषयमा छलफल भएको छ ।

भिडियो कन्फ्रेन्समार्फत भएको वार्तामा अर्थमन्त्री खतिवडाले आगामी दिनमा स्वास्थ्य उपचार, सामाजिक सुरक्षा, साना र मझौला उद्यमको व्यावसायिक निरन्तरता तथा रोजगारी सृजना गर्न आर्थिक स्रोतको अभाव हुने बताए ।

खतिवडाले आर्थिक वृद्धिदर न्यून भए पनि अन्य आर्थिक परिसूचक सकारात्मक रहेको बताए । उनले प्रतिकूलताका बावजुद मुद्रास्फिति ६ प्रतिशतको हाराहारीमा रहेको, चालू खाता घाटा कुल गार्हस्थ उत्पादनको २ प्रतिशतमा सीमित रहेको, शोधनान्तर बचत अमेरिकी डलर १.६ अर्ब भन्दा बढी रहेको, सरकारको सत्तिचत खाता (ट्रेजरी) घाटामा नगएको, वित्तीय क्षेत्र सुदृढ रहेको समेत कारणले समष्टिगत आर्थिक स्थायित्व कायम भएको जानकारी गराए ।

विश्व बैंकका उपाध्यक्ष हार्टविग सेफरले बैंकसँग नेपालले लिएको ऋणको परिचालन दक्षिण एशियाली क्षेत्रमै उत्कृष्ट भएकोमा धन्यवाद दिए । उनले कोभिड–१९ को नकारात्मक प्रभावका बावजुद नेपालको समग्र अर्थतन्त्र सकारात्मक रहेकोमा प्रशंसा पनि गरेको अर्थ मन्त्रालयले प्रेस विज्ञप्तिमार्फत जानकारी दिएको छ ।

सेफरले नेपालजस्ता कम विकसित देशले ब्यांकलाई तिर्नुपर्ने साँवाको किस्ता र ब्याज स्थगनको अवधि सन् २०२१ सम्म पुर्याउन पहल भइरहेको पनि जानकारी दिए ।