सुनको मूल्यले बनायो नयाँ रेकर्ड, विक्री भएन ३३० किलो सुन

काठमाडौं, १८ साउन । साताको पहिलो दिन सुनको मूल्य प्रतितोला ३०० रुपैयाँले वृद्धि भएको छ ।

आइतबार तोलामा ३०० रुपैयाँ बढेर सुनको प्रतितोला ९९ हजार ६०० रुपैयाँमा कारोबार भइरहेको छ । नेपाल सुनचाँदी व्यवसायी महासंघका अनुसार यो अहिलेसम्मकै महँगो मूल्य हो ।

आइतबार तेजावी सुनको मूल्य प्रतितोला ९९ हजार १६० रुपैयाँमा कारोबार भइरहेको छ ।

आइतबार चाँदी पनि तोलामा ३० रुपैयाँ बढेर प्रतितोला १ हजार२३० रुपैयाँमा कारोबार भइरहेको छ । चाँदीको मूल्य शुक्रबार २५ रुपैयाँ प्रतितोला घटेको थियो ।

कोरोना सङ्क्रमणका कारण विश्व अर्थतन्त्र नै ओरालो लागिरहेको बेला सुनको मूल्य भने दिनदिनै उकालो लागिरहेको छ ।

मूल्य महँगो हुँदै गएपछि विभिन्न बैंकमा लकडाउनअघि नै ल्याइएका ३३० किलो सुन बिक्री हुन नसकेको महासंघले बताएको छ ।