चौरजहारी हत्याकाण्ड : किशोरी र अर्का नाबालकलाई बाल सुधार गृह पठाउने आदेश

काठमाडौँ, १ असार । चौरजहारी हत्याकाण्डमा मुछिएका २ जना नाबालकलाई जिल्ला अदालत रुकुम पश्चिमले बाल सुधर गृहमा पठाउने आदेश दिएको छ ।

जेठ १० गते चौरजहारीमा प्रेमिका लिन पुगेका जाजरकोटका नवराज विकसहित ६ जनाको हत्या गरेको भन्दै आइतबार ३४ जना विरूद्ध मुद्दा दायर भएको थियो ।

अदालतले नवराजकी प्रेमिका र अर्का नाबालकलाई नेपालगञ्ज बाल सुधार गृहमा पठाउने आदेश जारी गरेको छ ।

दुवैको थुनछेक बयान र बहस आज भएको थियो ।

मंगलबारदेखि अरु आरोपितको बयान बयान हुनेछ । आइतबार नवराजकी प्रेमिकाका बावु, दाजु र वडाअध्यक्षलगायत ४२ जनालाई सरकारी वकिल कार्यालयले मुद्दा दायर गरेको थियो ।

उनीहरुमाथि क्रुरतापूर्वक ६ जनाको हत्या गरेको, १२ जनालाई घाइते बनाएको र जातीय विभेद गरेको आरोप लागेको छ ।

३४ जना अभियुक्तमध्ये २९ जनालाई प्रहरीले पक्राउ गरिसकेको छ भने ५ जना फरार रहेका छन् ।