काठमाडाैं, २२ जेठ । सरकारले कोरोना संक्रमितको संख्या दुई हजार नाघेपछि सबै अस्पतालमा आइसोलेसन सञ्चालन र सामान्य अवस्थाका बिरामीलाई घरमै आइसोलेसनमा राख्ने व्यवस्थासहितको निर्देशिका जारी गरेको छ ।
स्वास्थ्य तथा जनसङ्ख्या मन्त्रालयले मंगलबार स्वीकृत ‘कोभिड –१९ केसको आइसोलेसन व्यवस्थापनसम्बन्धी निर्देशिका २०७७’ जारी गरेको हो ।
निर्देशिकामा भेन्टिलेटर र अस्पतालमा भर्ना गर्नुपर्ने बिरामीलाई अस्पताल र सामान्य अवस्थामा रहेका बिरामीलाई घरमै विभिन्न सचेतनासहित राख्नेसम्बन्धी बुँदा समावेश गरिएको छ ।
जनस्वास्थ्य सेवा ऐन, २०७५ र कोभिड– १९ रोकथाम योजनाबमोजिम संक्रमितको सङ्ख्या दुई हजार नाघेर दोस्रो चरणमा प्रवेश गरेकाे अवस्थामा जनस्वास्थ्य विपत् अवस्था घोषणाको तयारी भएको पनि स्वास्थ्य मन्त्रालयले जनाएको छ ।
मन्त्रालयले कोरोनाबाट मृत भएकाको शव व्यवस्थापनसम्बन्धी कार्यविधि, २०७६ लाई पनि संशोधन गरी कार्यान्वयनमा ल्याएको छ ।