काठमाडौं, १९ जेठ । संघीय संसद अन्तर्गतको प्रतिनिधि सभामा पेश भएको संविधान दोस्रो संशोधन विधेयक जनताको जानकारीका लागि प्रकाशित गरिएको छ ।
संविधानको धारा २७४ र प्रतिनिधि सभा नियमावलीको नियम १३७ अनुसार संविधान संशोधन विधेयक संसदमा प्रस्तुत भएपछि सर्वसाधारणको जानकारीका लागि नेपाल राजपत्रमा प्रकाशन गरिएको संघीय संसद सचिवालयले जनाएको छ ।
३० दिनभित्र जनताको जानकारीका लागि प्रकाशित गर्नुपर्ने व्यवस्था थियो । जनताको प्रतिक्रियालाई सांसदहरुले लिएर संशोधनमार्फत् राख्न सक्ने व्यवस्था छ ।
विधेयकमा लिम्पियाधुरा, कालापानी, लिपुलेकलगायतका भूभाग समेटिएको नेपालको अध्यावधिक नक्सा संविधानको अनुसूची ३ मा उल्लेख गरिएको निशान छापसँग सम्बन्धित विषय मात्रै उल्लेख छ ।
मन्त्रिपरिषद् बैठकले ५ जेठमा लिम्पियाधुरा, कालापानी, लिपुलेकलगायतका भूभाग समेटिएको नयाँ नक्सा पारित गरेको थियो ।