काठमाडौं, १४ जेठ । प्रतिनिधि सभा सदस्य नवराज सिलवालले जातीय विभेद र मृत्यु प्रकरणको अनुसन्धान स्वतन्त्र रुपमा प्रहरीलाई छानबिन गर्न दिनुपर्ने प्रस्ताव गरेका छन् ।
उक्त घटनाको छानबिनका लागि गृह मन्त्रालयका सह सचिवको संयोजकत्वमा ५ सदस्यीय समिति गठन भइसकेको गृह मन्त्री रामबहादुर थापा बादलले सदनलाई जानकारी गरएका थिए भने सांसदहरूले संसदीय समिति गठनको माग उठाएका थिए ।
यसबीचमा प्रहरीको कार्य क्षमता र दक्षताबारे पनि राम्रो जानकारी राखेका ललितपुर क्षेत्र नम्बर १ का सांसद सिलवालले सामाजिक सञ्जालमा नै आफ्नो धारणा उल्लेख गरेका हुन् ।
उनले भनेका छन्,‘मानिसको चेतना र विवेक मारिएको रुकुमको घटनाले दलितहरू मात्र हैन हामी सवैलाई असिम पिडा दिएको छ ।यो आपराधिक घटना हो । कसैले राजनीति नगरौं । अनेकथरी समिति होईन प्रहरीको व्यावसायिक टिमलाई अनुसन्धान गर्ने जिम्मा दिऊँ ।’