लण्डन, ११ जेठ । जर्मन बुन्डेसलिगा फुटबलमा लिग लिडर बायर्न म्युनिखले सहज जित हात पारेको छ ।
शनिबार राति भएको खेलमा बायर्नले फ्रांकफर्टलाई ५–२ गोल अन्तरले पराजित गरेको हो । जितसँगै बायर्न म्युनिखले तालिकामा फेरि ४ अंकको अग्रता लिन सफल भएको छ ।
म्युनिखको ६१ अंक भएको छ भने दोस्रो स्थानमा रहेकाे बाेरसिया डर्टमण्डको ५७ अंक रहेको छ ।
घरेलु मैदानमा म्युनिखले १७ औं मिनेटमा अग्रता लिएको थियो । उसका लागि लियोन गोरेट्ज्काले गोल गर्दै अग्रता दिलाएका हुन् । ४१ औं मिनेटमा थोमस मुलरले गोल गरेपछि पहिलो हाफमा म्युनिखले २–० को अग्रता लिएको थियो ।
दोस्रो हाफको पहिलो मिनेटमा रोबर्ट लेवान्डोस्कीले गोल गरेपछि बायर्न म्युनिखले अग्रता ३–० बनाएको थियो । फ्रांकफर्टका लागि मार्टिन हिन्टेरेगरले लगातार २ गोल गर्दै अग्रता ३–२ मा ल्याएका थिए ।
उनले ५२ औं र ५५ औं मिनेटमा गोल गरेपछि फ्रांकफर्ट खेलमा फर्कन प्रयास गरेको थियो । अल्फाेन्सो डेभिसले ६१ औं मिनेटमा गोल गरेपछि बायर्नले ४–२ गोलको अग्रता बनायो ।
फ्रांकफर्टका लागि २ गोल गरेका हिन्टेरेगरले आत्मघाती गोल गरेपछि बायर्न अन्तमा ५–२ गोलले विजयी हुँदै स्पष्ट तीन अंक जोड्न सफल भयाे ।
कोरोना भाइरसको महामारीका बीच जर्मनमा बुन्डेसलिगा शुरु भएको हो । बुन्डेसलिगाका खेलहरु दर्शकविहीन रंगशालामा सञ्चालन भएका छन् ।