नेविसंघको नेतृत्वमा ७ विद्यार्थी संगठनले बुझाए परराष्ट्रमन्त्री ज्ञवालीलाई ज्ञापन पत्र

काठमाडौँ, २८ वैशाख । नेपालका ७ विद्यार्थी संगठनहरुले परराष्ट्रमन्त्री प्रदीप ज्ञवालीलाई ज्ञापन पत्र बुझाएका छन् । नेपाल विद्यार्थी संघको नेतृत्वमा प्रतिपक्षी ७ विद्यार्थी संगठनले मन्त्री ज्ञावलीलाई ज्ञापन पत्र बुझाएका हुन् ।

मन्त्री ज्ञवालीलाई बुझाईएको सयुक्त ज्ञापन पत्रमा नेपालको भुमिबाट तिव्वतमा रहेको कैलाश मानसरोवर यात्राका लागि उत्तराखण्डस्थित धार्चुला क्षेत्रको पिथौरागढबाट नेपालको दार्चुलाको गुन्जी क्षेत्र हुँदै लिपुलेक पुग्ने लिंक रोड निर्माण गर्ने भारतीय मिचाह प्रवृत्ति खेदजनक भएको उल्लेख छ ।

विद्यार्थी संगठनहरुको संयुक्त विज्ञप्तिमा सुगौली सन्धिअनुसार लिम्पियाधुरा, कालापानी र लिपुलेकसहित काली (महाकाली) नदीको पूर्वक्षेत्र नेपाली भूभाग हो, भन्ने प्रष्ट भएको र पछिल्लो पटक भारतले जारी गरेको नक्साका सम्बन्धमा पठाएको कूटनीतिक नोटमा समेत त्यसलाई उल्लेख गरिएको सन्दर्भमा आफ्नो भूमीको रक्षा गर्न सरकार द्वारा कुनै ठोस कदम नबढाउँनु दुःखद विषय रहेको उल्लेख छ ।

विद्यार्थीहरुले सरकारले सीमा मिचेको विषयमा सरकारले कदम नचाले आन्दोलन गर्ने चेतावनी दिएका छन् ।