अरब सुदूरक्षेत्रको मरभूमिमा ऊँट चराउने नेपालीलाई कृषि मन्त्री भुसालको अपिल

दैनिक नेपाल २०७६ माघ २८ गते १७:४९

–प्रतिक पौडेल

भैरहवा, २८ माघ । कृषि तथा पशुपन्छी विकास मन्त्री घनश्याम भुसालले कृषि क्षेत्रमा बिदेशी लगानी भित्राउने वातावरण आवश्यक रहेको बताएका छन् ।

भैरहवामा लुम्बिनी प्रेस क्लब सिद्धार्थनगरको भवन शिलान्यास गर्दै मंगलबार मन्त्री भुसालले कृषिमा प्रयोग भईरहेको श्रमलाई व्यवस्थित गरी उत्पादन क्षमताको विकास गर्न कृषि क्षेत्रमा पनि बिदेशी लगानी भित्राउन आवश्यक रहेको बताए ।

‘हामीले लगानी सम्मेलन गरेर बिभिन्न उत्पादन क्षेत्रमा लगानी भित्राउँदा कम्तिमा कृषि क्षेत्रमा लगानी गर्दा केही प्रतिशत नाफा हुन्छ भन्ने बिश्वास लगानीकर्तालाई दिलाई भित्राउनु पनेर्छ’, उनले भने ।

‘म यस क्षेत्रको अध्ययनमै छु म धेरै केही बोल्दीन तर लगानी गरे नाफा हुन्छ भन्ने अवस्थामा पुगेको छु’ उनले थपे ।

अब सरकारले कृषिमा काम गर्ने नागरिकका लागि मर्नुहुन्न, उद्यम डुब्दैन, मिहेनत खेर जाँदैन, खान नपाएर कोही मर्नुहुन्न, लालाबाला विचल्ली बनाएर हिँड्न पर्दैन भन्ने बेला आएको उनले बताए । भने,‘अरवब मरभूमिका सुदूरक्षेत्रहरुमा एक्लै ऊँट चराइरहेका नेपालीले सुन्नेगरी भन्नुछ– आउनुस् कृषी गर्नुस् तपाईले गरेको श्रम खेर जाँदैन ।’

कृषि मन्त्रालय सम्हालेका केही दिन आफू निराश भएको अनुभव सुनाएका उनले अहिले आत्मबल बढेको बताए । ‘अब केही गर्छु भन्ने उर्जा पलाएको छ’, उनले सुनाए ।

कृषिमा विदेशी लगानी आकर्षित गर्न योजना बनाएको बताएका उनले जोडे,‘कृषिबाट उद्यम डुब्दैन मिहेनत खेर जाँदैन । कृषि सुरक्षित छ भन्ने नीती, कार्यक्रम र गतिविधीहरुलाई शंकल्प गरेको बनाएको छु ।’