लण्डन, २० माघ । इंग्लिस प्रिमियर लिग फुटबल अन्तर्गत साबिक विजेता म्यानचेस्टर सिटीलाई टोटनह्यामले स्तब्ध पारेको छ ।
लिग अन्तर्गत आइतबार राति भएको खेलमा टोटनह्यामले म्यानचेस्टर सिटीलाई २–० ले पराजित गरेको हो ।
घरेलु मैदानमा भएको खेलमा पहिलो हाफमा दुवै तर्फबाट गोल भएन । ६० औँ मिनेटमा जिनचेन्को दोहोरो पहेँलो कार्ड पाएर मैदानबाट बाहिरिएपछि म्यानचेस्टर सिटी १० खेलाडीमा सीमित भयो ।
त्यसपछि टोटनह्यामले दुई गोल गरेको हो । ६३ औँ मिनेटमा स्टिभन बर्गवाइनले गोल गरेर टोटनह्यामलाई अग्रता दिलाए । ७१ औँ मिनेटमा सन हेङ–मिनले गोल गरेपछि टोटनह्याम २–० ले विजयी भयो । जितपछि टोटनह्याम पाँचौँ स्थानमा उक्लिएको छ ।
चौथो स्थानको चेल्सी भन्दा टोटनह्याम चार अंकले पछि छ । चेल्सीको २५ खेलबाट ४१ तथा टोटनह्यामको ३७ अंक छ । दोस्रो स्थानमा रहेको म्यानचेस्टर सिटीको ५१ अंक छ ।
दोस्रो स्थानको म्यानचेस्टर सिटी भन्दा शीर्ष स्थानको लिभरपुल २२ अंकले अघि रहेको छ । लिभरपुलले आउँदो मार्च २१ मा क्रिष्टल प्यालेससँगको खेलपछि उपाधि जित्न सक्ने छ ।