सोमबार, २ मंसिर २०७६
DainikNepal.com
सोमबार, २ मंसिर २०७६

गर्भपतनको औषधि बिक्री गर्ने स्वास्थ्यकर्मीसहित ३ जना पक्राउ

दैनिक नेपाल २०७६ मंसिर २ गते ६:२७

परासी, २ मंसिर । गर्भपतनको औषधि बिक्री गर्ने स्वास्थ्यकर्मीसहित ३ जनालाई प्रहरीले पक्राउ गरी मुद्दा चलाएको छ ।

पश्चिम नवलपरासीको रामग्राम नगरपालिकाकी २० वर्षीया युवतीलाई गर्भपतन गराउन एक युवकले स्थानीय क्लिनिकबाट औषधि खरिद गरेर दिएका थिए ।

प्रहरीका अनुसार युवतीले करिब ६ महिनाको गर्भ तुहाउन औषधि खाएकी थिइन् । औषधि खाएर घरमा सुतेकी युवतीको अत्यधिक पेट दुखेपछि परिवारले उपचारका लागि पृथ्वीचन्द्र जिल्ला अस्पताल परासीमा पुर्‍याएका थिए ।

शौच गर्न पुगेकी युवतीले त्यहीँ पुरुष लिंग खुलेको मृत शिशुको जन्म दिएकी थिइन् । मृत शिशु फेला परेपछि चिकित्सकले प्रहरीलाई खबर गरेका थिए ।

सोही क्रममा उनीसहित तीन जनालाई पक्राउ गरी कानुनी प्रक्रिया अगाडि बढाइएको जिल्ला प्रहरी उपरीक्षक लालमणि आचार्यले जानकारी दिए ।

छिमेकी एक युवकसँग प्रेम सम्बन्ध रहेका कारण युवतीले गर्भ बोकेको प्रहरीले जनाएको छ । ती युवक स्थानीय एक स्कुलको कक्षा १० मा अध्ययनरत हुन् ।

कानूनले बन्देज गराएको औषधि बिक्री गर्ने स्वास्थ्यकर्मी पनि स्थानीय सरकारी स्वास्थ्य संस्थामा अहेव पदमा कार्यरत रहेको प्रहरी उपरीक्षक आचार्यले बताए । सबैको नाम प्रहरीले गोप्य राखेको छ ।

प्रतिक्रिया
सम्बन्धित