आइतबार, २९ भदौ २०७६
DainikNepal.com
आइतबार, २९ भदौ २०७६

जलविद्युत परियोजना अघि बढाउनेबारे उर्जामन्त्री–जापानी राजदूतबीच छलफल

दैनिक नेपाल २०७६ भदौ ४ गते १९:४३


काठमाडौँ, ४ भदौ । उर्जा, जलस्रोत तथा सिंचाईमन्त्री वर्षमान पुन ‘अनन्त’ र जापानी राजदूत मासामिची साइगोबीच भेटवार्ता भएको छ । सिंहदरबारस्थित उर्जामन्त्रालयमा बुधवार भएको भेटवार्तामा द्धिपक्षीय हितका साथै उर्जा र जलस्रोतको क्षेत्रमा गर्न सकिने सहकार्यका विषयमा छलफल भएको थियो ।

भेटमा मन्त्री पुनले जाजरकोटमा रहेको ४१७ मेगावाटको नलसिंङगाड जलविद्युत परियोजना प्रादेशिक सन्तुलनका हिसावले पनि महत्वपूर्ण रहेको भन्दै परियोजनालाई अघि बढाउने विषयमा छलफल गरेका थिए ।

उनले जापान र नेपालबीच पुरानो र मैत्रीपूर्ण सम्बन्ध रहेको भन्दै विगतमा कुलेखानी परियोजनादेखी नलगाडसम्म जापानले गरेको सहयोगप्रति धन्यवाद व्यक्त गरे ।

मन्त्री पुनले नेपालको जापान भरपर्दो विकास साझेदार मुलुक भएको भन्दै नेपालमा अहिले लगानीको लागि उपयुक्त वातावरण बनेकोले लगानीको लागी जापानमा सन्देश प्रवाह गरिदिन राजदूत साइगोसँग आग्रह गरे ।

भेटमा जापानी राजदूतले नलसिंङगाड परियोजना जाइकाले पिपिपी मोडेलमा अध्ययन गरिरहेको जानकारी दिए । उनले मन्त्री पुनलाई जापान भ्रमणको निम्तो दिँदै सो क्रममा दुई देशको सम्बन्धका साथै उर्जा र जलस्रोतमा गर्न सकिने सहकार्यका विषयमा समेत छलफल गर्ने जानकारी दिए ।

जापानी राजदूतले नेपालको जलविद्युत क्षेत्रमा लगनीका लागि राम्रो वातावरण बनेको सुखद समाचार सुनेको भन्दै जापानमा समेत लगानीका लागि आफूले अपिल गर्ने बताए ।

राजदूत साइगाले भारत र वङगलादेशसँग सहमति भएको क्रस बोर्डर प्रशारण लाइनबारे समेत चासो व्यक्त गरेका थिए । जवाफमा मन्त्री पुनले भारतसँग क्रस बोर्डर टे«डको विषयमा राम्रो वातावरण बनेको र गत वर्ष मात्र ७ करोड र यो वर्ष २५ करोडको विजुली भारतमा निर्यात भएको जानकारी दिए ।

उनले बङगलादेशसँग पनि डेडिकेटेट लाइन र भारत हुँदै बङगलादेशसँग पनि विद्युत व्यापार गर्ने विषयमा सहमति भएको भन्दै लगानीको लागि वातावरण बनाईदिन आग्रह गरे ।

नलसिंङगाड परियोजना पिपिपी मोडलमा बनाउने गरी हाल जापानले अध्ययन गरिरहेको छ । उक्त परियोजनालाई अघि बढाउने विषयमा छलफल गर्न उर्जामन्त्री पुन जापानी विकास नियोग जाइकाको मुख्यालयको भ्रमण गर्ने कार्यक्रम छ । जापान भ्रमणकै क्रममा उहांले आफ्ना समकक्षीसंग समेत उक्त परियोजनाका विषयमा छलफल गर्ने तयारी छ ।

प्रतिक्रिया
सम्बन्धित