भाइरल बन्दै बसन्तको ‘कुखुराको भाले’ (भिडियोसहित)

काठमाडौँ । तनहुँका गायक बसन्त विश्वकर्माको पछिल्लो गीत ‘कुखुराको भाले’ भाइरल बन्न थालेको छ ।

उनीसहित प्रीति आले, राजु ढकाल र कला लम्सालको आवाज रहेको रोइला दोहोरी गीत ‘टीकटक’ लगायतका सामाजिक सञ्जालमा भाइरल बनेको हो ।

बसन्तकै यूट्युब च्यानबाट अघिल्लो शुक्रबार सार्वजनिक गरिएको गीतमा बसन्त स्वयंको शब्द र संगीत रहेको छ । गीतको भिडियोलाई अहिलेसम्म डेढ लाखले हेरेका छन् ।

भिडियोमा बसन्तसँगै, प्रीति आले, राजु ढकाल र सबिता आलेको अभिनय रहेको छ । सानैदेखि गीत गाउने रहर बोेकेको एउटा केटाको विषयमा भिडियो बनाइएको छ ।

गाउँमा जातीय छुवाछुतको मार खेपेको केटा परिवारसहित तराई बसाईँ सर्छ तर, उसको गीत गाउने रहर मर्दैन । एकदिन ऊ कुखुराको भाले बोकेर गीत गाउन भन्दै काठमाडौँ आउँछ । तर, बिडम्बना उसले त्यो भाले बेच्न नपाउँदै मर्छ ।

यस्तै परिवेशमा भिडियो निर्माण गरिएको छ । तर, भिडियोको अवधारणा आफ्नो जीवनसँग भने मेल नखाएको गायक विश्वकर्माले दैनिक नेपाललाई बताए ।

बसन्तले यसअघि ज्यानमाया, शितको थोपा मुना मुनामा, गल्लाले, नौजाले लगायतका गीत बजारमा ल्याइसकेका छन् ।

हेर्नुहोस् भिडियो