सुनसरी, १० चैत । विवाद सुल्झाउने जिम्मेबारी पाएको स्थानीय तहको न्यायीक समिति प्रमुखले पति बोलाएरै कुटपिट गर्न लगाएपछि के हुन्छ ?
नेपाली कांग्रेसका नेता विजयकुमार गच्छादारको गृहनगर दुहवी भलुवा नगरपालिकाकी उपमेयरले यसै गरेपनि कुनै कारबाही भएको छैन ।
शक्तिको आडमा सामान्य विवादमा पदको ध्वाँस देखाउँदै सोही नगरपालिका– ५ नम्बर वडाका अध्यक्ष रमेश रौनियार र सदस्य कृष्ण तामाङलाई उपमेयर सुनिता दाहाल साहले पति सुनिल साहलाई बोलाएर शुक्रबार कुटपिट गराइन् ।
उपमेयरलाई स्थानीयस्तरका विवाद मिलाउने न्यायिक समितिका संयोजकको समेत जिम्मेवारी हुन्छ ।
खेल मैदान निर्माण सकिएकोले अनुगमन गरी बजेट फर्छौट गरिदिने वडाअध्यक्षको माग थियो । यहि विषयमा विवाद भएको थियो । वडा सदस्य तामाङले चाडो रकम निकासाको माग गर्दा निस्कन भन्दै बाहिर निकालिन् । पछि किन निस्कने भन्दा पति बोलाएर कुटपिट गरेको जनाइएको छ । निर्माण सम्बन्धी फाइल उपमेयरले नियन्त्रणमा लिइ काम रोकेको वडा अध्यक्ष रमेश रौनियारको आरोप छ ।
कुटपिट पछि आक्रोशित सर्वसाधरणले दुहबीनगरपालिका दिनभर घेराउ गरेका थिए । कुटपिटपछि पीडितपक्ष र मेयरवीच छलफल भएपनि कुनै सहमति हुन सकेन् ।
नगरपालिकाका मेयर वेद गच्छादारले उपमेयरको उक्त भिडियो बाहिर आउनुले दुख लागेको बताए । जिम्मेबार पदमा बसेको मानिसले यसरी विवादलाई कुटपिटमा लग्नुभन्दा समाधानमा ध्यान दिनुपर्नेमा उल्टो भएको मेयरको टिप्पणी छ ।
प्रतिक्रिया