सुरु भयो आईजिपीको दौडमा, सर्वेन्द्र, रमेश र पुष्करमध्ये कसले बाजी मार्ला ?

काठमाडौं, ६ कात्तिक । डिआईजी रमेश खरेल संयुक्त राष्ट्रसंघीय शान्ति मिसनबाट फर्किएका छन् । मासिक करिब १४ लाख कमाई हुने पी–४ तहको जागिरमा उनी राष्ट्रसंघ अन्तर्गत सुडानमा कार्यरत थिए । नेपाल समाचार पत्र दैनिकले खबर छापेको छ ।

सुडान मिसनमा उनको ६ महिना अवधि बाँकी नै थियो । तर, नयाँ आईजिपीका लागि दौडधुप सुरु भइसकेकाले उनले बीचमै मिसन छाडेका हुन् । खरेल भावी आईजिपीमा बलिया प्रतिस्पर्धी हुन् ।

अहिलेकै ऐन/नियम अनुसार आगामी चैतको अन्तिमबाट अहिलेका आईजिपी प्रकाश अर्यालसहित सबै एआईजीले अवकाश पाउनेछन् । त्यो अवस्थामा डिआईजीहरु सर्वेन्द्र खनाल, रमेश खरेल र पुष्कर कार्कीमध्ये एक आईजिपी हुने छन् ।

आफ्नो कार्यकाल २ वर्षको भएपनि मातृभुमीको सेवाका लागि नेपाल फर्किएको खरेलले फेसबुक स्टाटसमार्फत जनाएका छन् ।

खरेल नेपाल प्रहरीका ‘पहिलो हिरो’का रुपमा चर्चित छन् । एसएसपीसम्म पहिलो नम्बरमा बढुवा हुँदै आएका उनी डिआईजीमा दोस्रो नम्बरमा पारिएको थियो ।