महेन्द्रनगर, १४ असार । स्थानीय तहको दोस्रो चरणको निर्वाचनअन्तर्गत कञ्चनपुरमा नेकपा एमालेका कार्यकर्ता कुटिएका छन् ।
सत्तारुढ नेपाली कांग्रेसका कार्यकर्ताले शुक्लाफाँटा नगरपालिका वार्ड नम्बर १२ स्थित शिवसंकर मावि बुथ केन्द्रमै एमाले कार्यकर्तामाथि आक्रमण गरेको मेयरका उम्मेदवार रणबहादुर महराले जानकारी दिए ।
कांग्रेस कार्यकर्ता उत्तमसिंह साउदको नेतृत्वमा आएको २० जनाको समूहले विना कारण आफ्ना कार्यकर्तामाथि आक्रमण गरेको उनको आरोप छ ।
कांगे्रेस कार्यकर्ताको कुटाइबाट एमाले निकट जयन्त प्रसाद भट्ट र महेश प्रसाद भट्ट घाइते भएका छन् । जयन्तप्रसादको मुखमा गहिरो चोट लागेको छ ।
यसैबीच पीडित जयन्त र महेशले आफूमाथि आक्रमण गर्नेलाई पक्राउ गरी कारवाही गर्न माग गर्दै इलाका प्रहरी कार्यालय झलारीमा जाहेरी दिएका छन् । दुबै जनाले आफूमाथि ज्यान मार्ने उद्देश्यले हतियारसहित सांघातिक हमला गरेको आरोप समेत लगाएका छन् ।
यता इलाका प्रहरी कार्यालय झलारीले घटनाबारे छानविन थालिएको प्रतिक्रिया दिएको छ ।
कञ्चनपुरमा कांग्रेसका प्रभावशाली नेता एवं पूर्वमन्त्री एनपी साउदको नेतृत्वमा कांग्रेस कार्यकर्ताले सत्ता आडमा दादागिरी देखाउने गरेका छन् ।
प्रतिक्रिया