बाँदरमुढे घटनाको १२ वर्ष पूरा, पीडितको पीडा अझै उस्तै

चितवन, २३ जेठ,। तत्कालीन नेकपा माओवादीले यात्रुवाहक बसमा बम विस्फोट गराएको माडी बाँदरमुढे घटना भएको आज १२ वर्ष पूरा भएको छ।

घटना भएको दशक पुग्न लाग्दा पनि घटनाका पीडितहरूले भने उचित राहत पाउन सकेका छैनन्। बाँदरमुढे घटना पीडित सङ्घर्ष समितिका उपाध्यक्ष कृष्ण अधिकारीले न्याय नपाउने आशङ्का बढिरहेको भन्दै पीडितलाई थप पीडा नदिन आग्रह गरे । न्याय दिन आलटाल भइरहेको भन्दै उनले उचित न्याय दिनेतर्फ सबै गम्भीर हुनुपर्ने बताए ।

वि सं २०६२ जेठ २३ गते बाँदरमुढे घटनामा परी ३८ जनाको ज्यान गएको थियो भने ७२ जना घाइते भएका थिए । अयोध्यापुरीबाट यात्रु लिएर नारायणगढ आउँदै गरेको ना२ख ३२४५ नंको बसमा माओवादीले बम विस्फोट गराएका थिए ।

अहिलेसम्म घाइतेमध्ये थप चार जनाको मृत्यु भएको छ भने चार जनाले नियमित रुपमा मानसिक औषधि खाइरहेका छन् । अन्य घाइतेको अवस्थासमेत सामान्य हुन नसकेको घटना पीडित सङ्घर्ष समितिका उपाध्यक्ष अधिकारीले जानकारी दिए ।

अधिकारीका अनुसार घटनामा टाउकोमा चोट लागेका घाइते गङ्गाबहादुर गुरुङको दुई वर्षपछि मृत्यु भएको थियो । त्यस्तै चुनु केसीको चार वर्षपछि, नरहरि सापकोटाको डेढ वर्षपछि र नारायणदत्त पौडेलको तीन वर्षपछि निधन भएको थियो ।