भरतपुरमा पुनः मतदान गर्ने निर्णयबारे यस्तो आयो एमालेको प्रतिक्रिया

काठमाडौं, २० जेठ । भरतपुर महानगरपालिकाको वडा नं. १९ मा पुनः मतदान गराउने निर्वाचन आयोगको निर्णयमा नेकपा एमालेले असहमति जनाएको छ ।

शनिबार बसेको स्थायी समिति बैठकले पुनः निर्वाचन गर्ने निर्णय संविधान विपरित भएको निष्कर्ष निकाल्दै अस्वीकार गर्ने निर्णय गरेको हो ।

बैठकपछि एमाले अध्यक्ष केपी ओलीले आयोगको निर्णय मान्य नहुने बताए । उनले भने, ‘यो संविधान विपरित छ । हामीलाई मान्य छैन । यसको विकल्प खोज्छौं ।’ विकल्प कस्तो हुने भनेर भने ओलीले खुलाएनन् ।

चितवनको भरतपुर महानगरपालिका वडानम्बर १९ मा पुनः मतदान गर्ने निर्वाचन आयोगले निर्णय गरेको छ । मतदानका लागि नयाँ मिति तोक्न भरतपुरका मुख्य निर्वाचन अधिकृतलाई आयोगले निर्देशन पनि दिएको छ ।