काठमाडौँ, २१ चैत । नेपाल र सङ्घीय गणतन्त्र जर्मनीबीचको लामो समयदेखिको पारस्परिक मैत्रीपूर्ण सम्बन्ध तथा सहयोगलाई अझ सुदृढ तुल्याउने उद्देश्यले त्यहाँका वातावरण, प्रकृति संरक्षण, निर्माण तथा आणविक सुरक्षामन्त्री डा बारबरा हेन्डरिक्स नेपालको चारदिने भ्रमणका क्रममा हाल राजधानीमा हुनुहुन्छ ।
यहाँ रहँदा मन्त्री हेन्डरिक्सले जर्मनीको सहयोगमा नेपालमा सञ्चालित वातावरण तथा वनसँग सम्बन्धित विकास परियोजनाबारे स्थलगत जानकारी लिनुका साथै वातावरणमन्त्री जयदेव जोशी र वनमन्त्री शङ्कर भण्डारीसँग द्विपक्षीय संयुक्त परामर्श गर्ने कार्यक्रम रहेको यहाँस्थित जर्मनीे राजदूतावासले जनाएको छ ।
उहाँले ललितपुरको गोदावरीस्थित गोदावरी ज्ञान उद्यानमा अन्तर्राष्ट्रिय एकीकृत पर्वतीय विकास केन्द्र (इसिमोड)ले कार्यान्वयन गरेको जैविक विविधता संरक्षण परियोजनाको व्यवस्थापन एवम् सञ्चालनबारे स्थलगत जानकारी लिनुहुनेछ ।
त्यसैगरी जर्मनीका वातावरणमन्त्रीले काभ्रेको काल्चीबेँसीस्थित पाल्तेखेत गाउँमा समुदायद्वारा सञ्चालित जलवायु परिवर्तनका चुनौती थेग्ने तथा अनुकूलन परियोजनाका साथै वन व्यवस्थापन एवम् प्रकृति संरक्षणमा भएका प्रगतिबारे जानकारी लिने कार्यक्रम रहेको उक्त दूतावासले आज जनाएको छ ।
मन्त्री हेन्डरिक्स आइतबार राति राजधानी आइपुग्नुभएको हो । रासस
प्रतिक्रिया