प्रधानमन्त्रीद्वारा साउदी र श्रीलंकाका नेपालीको उद्धार गर्न निर्देशन

काठमाडौं, २४ साउन । प्रधानमन्त्री पुष्पकमल दाहालले परराष्ट्र सचिव शंकरदास बैरागीलाई टेलिफोन गरी साउदी अरब र श्रीलंकामा अलपत्र परेका नेपालीलाई तुरुन्तै राहत र नेपाल आउने वातारण निर्माण गर्न निर्देशन दिनुभएको छ ।

प्रधानमन्त्रीले निर्देशनमा भन्नुभयो, ‘साउदी अरबमा सयौं नेपाली र श्रीलंकामा ४५ जना नेपाली महिला अलपत्र परेको समाचार आएको छ । यथार्थ बुझेर तुरुन्ता–तुरुन्तै उनीलाई राहत, रोजगारीको व्यवस्था र नेपाल फर्कने व्यवस्था गर्नुस् ।’

प्रधानमन्त्री दाहालले सम्बन्धित देशको सरकार र दूतावाससँग समन्वय गरी यथाशीघ्र उनीहरूलाई त्यही रोजगारीको व्यवस्था गर्न र त्यसो नभए सरकारी खर्चमै नेपाल ल्याउन पनि निर्देशन दिनुभएको हो ।

जवाफमा परराष्ट्र सचिवले प्रधानमन्त्रीको निर्देशन तुरुन्तै कार्यान्यवन गर्ने बताउनुभएको निजी सचिवालयद्वारा जारी विज्ञप्तिमा उल्लेख छ ।