रुकुम । रुकुम जिल्लाको गरायला गा.वि.स. वडा नं. ३ मसारी मा बुवा काली बहादुर परियार र आमा मुवा देवी परियार को कोख बाट वि. सं. २०४५ साल जेष्ठ २० गतेका दिन तेस्रो सन्तानका रुपमा जन्मिएका हुन् गायक तिलक परियार ।गाउँको सामान्य परिवारमा जन्मिएर गाउँघरमा उकाली ओराली, घाँस दाउरा अनि मेलापात गर्दै हुर्केका गायक तिलक परियार अहिले काठमाडौंलाई आफ्नो कर्मथलो बनाएर गायन क्षेत्रमा निरन्तर रुपमा लागिरहेका छन् । समाजको यथार्थ कुरा, सुःख–दुःख, मायाँ प्रीति आदिलाई आधार मानेर रचना गरिएका गीतलाई नै लोकगीत हो भन्न रुचाउने गायक तिलक परियारले गायन पेशा संगसंगै आफ्नो अध्ययनलाई पनि निरन्तरता दिईरहेका छन् । त्रिभुवन विश्वविद्यालय कीर्तिपुर काठमाडौंमा स्नातकोत्तर तह सक्नै लागेका र एल. एल. बी. समेत अध्ययनरत गायक परियार वि. सं. २०६५ सालमा लोक तथा दोहोरी गीतको क्षेत्रमा प्रबेश गरेका हुन् । उन्ले पहिलो प्रस्तुतीको रुपमा वि. सं. २०६६ सालमा दुःख पाईछौरे भन्ने बोलको लोकदोहोरी गीत बजारमा ल्याएका थिए । वि. सं. २०६७ साल पुष महिनामा रेडियो नेपाल बाट स्वर पास गरिसकेका परियारले हाल सम्म तीन दर्जन भन्दा बढी गीतमा आवाज दिई सकेका छन् । उनीद्धारा स्वरबद्ध गरिएका सबै गीतहरु दर्शका र स्रोताको ढुकढुकीमा बस्न सफल गीत हुन् । दुःख पाईछौरे, सूनको भमरा, सुन हजुर, रिम्ना दोभान, क्या राम्री रैछौनी, तिम्रो मन दुख्न दिन्न सानु, जे गर्नु त यहाँ धनले गर्दो रहेछ जस्ता सफल गीत गायक तिलक परियारकै आवाजमा सजिएका छन् ।
आफूले आवाज दिएका लोक तथा दोहोरी गीतहरु दर्शक स्रोताले औधी मन पराएर सबै गीतलाई समान न्याय दिलाए जस्तो अनुभूति आफ्नो मनमा संगालिरहेको गायक परियार बताउँछन् । सोही क्रममा गायक तिलक परियारलाई लोकदोहोरी गायकको रुपमा सबै भन्दा बढी चिनाउने कुनै एक गीतको नाम लिनुस् भन्दा उन्ले “सुनको भमरा” नामक बोलको गीतलाई नै सम्झिए । खास गरेर सुनको भमरा गीतले राप्ती अञ्चल र रुकुम जिल्लाको भौगोलिक परिवेश, चाडपर्व, संस्कार र यहाँको संस्कृति लगायत विविध कुराको यथार्थतालाई वर्णन गरेर गीत मार्फत नयाँ सन्देश दिन खोजेकोले वास्तवमा यो गीतलाई सबैले मन पराएको उन्ले बताए । पछिल्लो समय लोकगीत र लोकगीतको क्षेत्रमा विकृति छाएको छनी ? भन्दै गर्दा गायक परियारले पहिलेका गीत समाजका लागि यथार्थ सन्देश दिने खालका हुन्थ्ये, तर अहिलेका लोक गीत केवल व्यवसायिक रचनामा आधारित छन् भन्ने कुरामा फरक छुट्टयाए । तर यस्तो लोक गीतको सिर्जना हुनुले नेपाली लोक तथा दोहोरी गीतको मर्मलाई भुल्दै जानु र दर्शक स्रोतालाई लोकगीतको बारेमा राम्रो सन्देश दिनै नसक्ने उन्ले बताए ।
पहिलेका गीतमा ठेट लोक बाजाहरु (मादल, बाँसुरी र सारङ्गी) को प्रयोग हुँदा ती गीतमा समेटिएका शब्द र भावले गर्दा पुराना लोकगीत सबैले मन पराउँथ्ये । तर अहिले ठेट बाजा संग संगै विदेशी बाजाहरु (गितार, सेक्सोफोन र भ्वाईलिन) आदिको प्रयोगको विकास भएर पनि अहिलेका गीतहरुमा वास्तविक लोकगीतको भाव नदेखिएको उनी बताउँछन् ।
समयको माग अनुसार प्रविधिको विकास हुनु स्वभाविक हो तरपनि पछिल्लो समय गीत संगीतमा देखिएको अस्वस्थ प्रर्तिस्पर्धाले गीत संगीतको क्षेत्रमा केही जटिल समस्याहरु थपिएको गायक परियार बताउँछन् ।
– अमरराज पुनबाट ।
प्रतिक्रिया