– विमल योगी
काठमाडौं, ५ साउन । नेपाली काँग्रेस र नेकपा माओवादी केन्द्रको बैठक सकिएको छ ।
कांग्रेस संसदीय दलको कार्यालय सिंहदरबारमा बसेको बैठकले भोलिको संसद बैठकमा पहिला सरकारविरुद्धको अविश्वासको प्रस्ताव पारित गर्ने निर्णय गरेको छ ।
बैठक सकिएपछि कांग्रेस सभापति शेरबहादुर देउवाले भोलि संसदमा पहिला अविश्वासको प्रस्ताव पारित हुने बताए । अविश्वासको प्रस्ताव के हुन्छ भन्ने सञ्चारकर्मीको प्रश्नमा उनले भने– ‘प्रस्ताव बहुमतले पास हुन्छ ।’
यसैगरी बैठकबाट बाहिरिने क्रममा नेकपा माओवादी केन्द्रका अध्यक्ष पुष्पकमल दाहाल प्रचण्डले समसामयिक विषयमा छलफलमा भएको बताए ।
कांग्रेस नेता रमेश लेखकले पनि संसदको पहिलो कार्यसूची अविश्वासको प्रस्ताव नै हुने बताए । उनले भने– विश्वमा चलिआएको परम्परा र संसदीय व्यवस्थामा अविश्वासको प्रस्ताव दर्ता भइसकेपछि यसले नै पहिलो प्राथमिकता पाउँछ । अविश्वासको प्रस्ताव दर्ता भइसकेको अवस्थामा अविश्वासकै प्रस्ताव अघि बढ्छ । अरु (बजेट) पछि (दोस्रो)मा आउँछ ।
बैठकमा कांग्रेसका तर्फबाट सभापति एवम् प्रतिपक्षी दलका नेता शेरबहादुर देउवा, वरिष्ठ नेता रामचन्द्र पौडेल र नेता विमलेन्द्र निधि तथा माओवादी केन्द्रका अध्यक्ष पुष्प कमल दाहाल र नेता कृष्णबहादुर महराको सहभागिता थियो ।
माओवादी केन्द्रले नेकाँसँग मिलेर असार २९ गते अविश्वासको प्रस्ताव सदनमा दर्ता गरेको थियो । सो प्रस्तावमाथि भोलि सदनमा छलफल सुरु हुँदैछ ।
तस्वीरः युपी लामिछाने ।
प्रतिक्रिया