काठमाडौं, ३१ असार । सरकारबाट समर्थन फिर्ता लिँदा समेत प्रधानमन्त्री केपी शर्मा ओलीले राजीनामा नदिएपछि नेकपा माओवादी केन्द्रले बजेट पारित हुन नदिने निर्णय गरेको छ ।
व्यवस्थापिका संसद सचिवालयका अनुसार आज बजेटसम्बन्धि विधेयकहरु पारित गर्ने कार्यसूची थियो । तर, माओवादीको यो निर्णयसँगै आज बजेट पास नहुने भएको छ ।
शुक्रबार बिहान अध्यक्ष पुष्पकमल दाहाल प्रचण्ड निवास लाजिम्पाटमा बसेको केन्द्रको बैठकले कांग्रेस र माओवादीद्धारा प्रस्तुत अविश्वासको प्रस्ताव पास नभएसम्म बजेटसँग सम्बन्धित विधेयकहरु पारित हुन नदिने निर्णय गरेको प्रवक्ता पम्फा भुसालले जानकारी दिइन् ।
उनका अनुसार ओली सरकार अल्पमतमा परिसकेको र अविश्वासको प्रस्ताव पनि संसदमा पेश भइसकेको सन्दर्भमा अविश्वासको प्रस्ताव पास नभएसम्म कुनैपनि विधेयक पारित गर्न नदिने निर्णयमा माओवादी पुगेको हो ।
बैठकमा मुलुकको पछिल्लो राजनीतिक अवस्था, नयाँ सरकार गठन एवम् समग्र राजनीतिक विषयमा छलफल भएको थियो ।
बैठकमा नयाँ सरकार गठन, सरकारमा पार्टीको तर्फबाट अपनाउनुपर्ने नीतिलगायतका विषयमा समेत छलफल भएको प्रवक्ता भुसालले बताइन् । बैठक भोलि शनिबार बिहान पुनः बस्नेछ ।
प्रतिक्रिया