विश्व बजारमा गरिखान सक्ने क्षमतावान जनशक्ति उत्पादन गर्न प्रधानमन्त्रीको निर्देशन

काठमाडौँ, २ असार । प्रधानमन्त्री केपी शर्मा ओलीले बुद्धका जीवनोपयोगी सन्देशलाई घर घरमा पुर्याउन आग्रह गर्नुभएको छ ।

लुम्बिनी बौद्ध विश्वविद्यालयको सातौँ विश्वविद्यालय सभामा आज सो विश्वविद्यालयका कुलपतिसमेतका रहनु भएका प्रधानमन्त्री ओलीले सम्बोधन गर्दै बुद्ध दर्शनका उपयोगी शिक्षालाई सिङ्गो समाज परिचालन हुने गरी प्राज्ञिक कार्यक्रम ल्याउन जोड दिनु भयो ।

उहाँले विश्व बजारमा गरिखान सक्ने क्षमतावान र गुणवान जनशक्ति उत्पादनमा ध्यान दिन पनि निर्देशन दिनुभयो ।

प्रधानमन्त्री निवास बालुवाटारमा भएको बैठकमा शिक्षामन्त्री गिरिराजमणि पोखरेलले विश्वविद्यालयका लागि आवश्यक भौतिक पूर्वाधारको सहयोगमा सरकार पछि नपर्ने विश्वास दिलाउनुभयो ।

उपकुलपति प्रा डा नरेशमान बज्राचार्यले विश्वविद्यालयको गुरुयोजना बमोजिम भौतिक पूर्वाधार र शैक्षिक कार्यक्रममा सरकारबाट थप सहयोगको अपेक्षा राख्नुभयो ।

बैठकले रजिष्टार तिलकराम आचार्यद्धारा आगामी आर्थिक वर्ष ०७३-७४ का लागि अनुमानित रु ३३ करोड ७७ लाख ७१ हजार सात सय ६८ बराबरको बजेट पारित गरेको छ । रासस