– विमल योगी
काठमाडौं, १७ जेठ । प्रमुख प्रतिपक्षी दल नेपाली कांग्रेसले सोमबार व्यवस्थापिका संसदमा बजेटको सूचना चुहिएको भन्दै एकै दिन चार पटक बैठक अवरुद्ध गरेर रेकर्ड कायम गरेको छ ।
यसअघि एक वा दुई चोटी अवरुद्ध पार्दा बैठक स्थगित गरिन्थ्यो । तर, आज कांग्रेसले लगातार तीन पटक बैठक अवरुद्ध गरिसक्यो । तरपनि सत्तारुढ दलहरुको दबाबमा सभामुखले अझै ३ बजेपछि बस्नेगरी बैठक बोलाइन् । यो चौथो बैठकपनि अवरुद्ध भयो ।
व्यवस्थापिका संसदका एक उच्च कर्मचारीले भन्दै थिए- ‘आज त कांग्रेसले रकेर्ड नै तोड्यो । अवरुद्ध पनि कति गरेको हो । सभामुख ज्यूले बैठक स्थगित गर्नुपर्ने हो, बोलाएको बोलायै हुनुहन्छ ।’
आजदेखि बजेटमाथि छलफल गर्नेगरी संसदको बैठक बोलाइएको थियो । तर, प्रमुख विपक्षी कांग्रेसले संसदमा पेश गर्नु अघि नै बजेट सार्वजनिक भएको भन्दै लगातार अवरुद्ध पारे ।
आजको बैठकको सुरुमा पूर्वअर्थमन्त्री डा. रामशरण महत बोले । उनले बजेट सार्वजनिक हुनअगाडि नै पत्रिकामा आएको र यसले संसदको मानहानी भएको भन्दै छानविन समिति गठन गर्न माग गरे । त्यसपछि कांग्रेसका सांसदहरुले उठेर नाराबाजी गरेपछि संसद आधा घन्टाका लागि स्थगित भयो ।
यसअघि महतले बजेट सार्वजनिक भएको दिन केपी ओली सरकारको यो बजेटले वित्तीय अराजकता ल्याउने दाबी गरेका थिए ।
त्यसपछि बसेको दोस्रो बैठकमा पनि कांग्रेसले आफ्नो अडान यथावत राख्यो । कांग्रेस सांसद रमेश लेखकले संसदीय समिति गठन नभएसम्म सदनको काम कारबाही अघि बढ्न नसक्ने बताएपछि बैठक फेरि आधा घन्टाका लागि दिउँसो साढे १ बजेसम्म स्थगित भयो ।
करिब १५ मिनेट ढिलो बसेको तेस्रो बैठकमा कांग्रेसका सांसद एवं पूर्व अर्थमन्त्री महेश आचार्यले सार्वभौम संसद्को विशेषाधिकारमा आघात पुग्ने गरी बजेटका सूचना चुहिनु गम्भीर भएको भन्दै छानबिन गर्न माग गरे ।
तेस्रो बैठक पनि कांग्रेसबाट अवरुद्ध भएपछि सभामुखले बैठक साढे ३ बजे बस्ने गरी स्थगित भएको घोषणा गरेकी थिइन् ।
साढे तीन बजेपछि सुरु भएको यो बैठक पनि कांग्रेसले चल्न दिएन । चौथो बैठक सुरु हुनेवित्तिकै कांग्रेस सांसद ईश्वरी न्यौपानेले सार्वभौम संसद्को विशेषाधिकारमा आघात पुग्ने गरी बजेटका सूचना चुहाइएको घटनाको छानबिन र चित्त बुझ्दो जवाफ नआएसम्म सदनको कारबाही अगाडि बढ्न नसक्ने चेतावनी दिइन् ।
त्यसपछि सभामुख ओनसरी घर्तिले मङ्गलबार ११ बजेसम्मका लागि संसद् स्थगन गरेको घोषणा गरिन् ।
प्रतिक्रिया