काठमाडौं, १७ जेठ । कांग्रेस र मधेसवादी दलहरूलाई प्रयोग गरेर केपी ओली सरकार गिराउने दाउ तुहिएपछि तिल्मिलाएको भारत यो कार्ड उपयोगहीन भएसँगै के सोच्दै होला ?
नेपालमा अनेक दाउपेच रचेर अस्थितरता निम्त्याउँदै आएको भारत के अब चाहिँ थाकेकै हो त ? साँघु साप्ताहिकले समाचार छापेको छ ।
नेपाल मामलामा भारतको आगामी कदमबारे अनेक आशंका र प्रश्नहरू उब्जिरहेका बेला नयाँदिल्लीले गुप्त रुपमा काठमाडौंमा विशेषदूत पठाएर राजनीतिक चलखेल सुरू गरेको दाबी स्रोतले गरेको छ ।
स्रोतका अनुसार, भारतको विगतको दबदबा चिर्न चिनियाँ पक्ष नेपालको हरेक मामलामा हावी हुन थालेपछि झस्किएको भारतले जसरी भएपनि ओली सरकार गिराउनु पर्ने निष्कर्ष निकाल्दै केही विशेष दूतहरूलाई यसको जिम्मा दिएर नेपाल पठाएको चर्चा एकथरीले गरेका छन् ।
अर्काथरी स्रोत भन्छ, पूर्व महाराजा ज्ञानेन्द्र शाहको नयाँदिल्ली दौड र राजतन्त्र पुनःस्थापनाको खेललाई तुहाउने विशेष मिशन बोकेर आलोक जोशीको विशेष टिम काठमाडौं आएको बताउँछन् ।
नयाँ योजना अनुसार, ओली सरकारलाई दुई महिनाभित्र गिराउने म्याण्डेट लिएर आएका भारतीय प्रधानमन्त्री नरेन्द्र मोदीका विशेषदूतका हुन् नेपालका लागि भारतीय पूर्वराजदूत राकेश सुद ।
राकेश सुद केही दिन काठमाडौंमा मन्त्रणा गरेर दिल्ली उडे लगत्तै भारतीय खुफिया एजेन्सी ‘रअ’का पूर्वप्रमुख सहितको विशेष टिम २०७३ जेठ ३ गते काठमाडौं उत्रिएर व्यापक गृहकार्यमा जुटेको बुझिएको छ ।
स्रोतका अनुसार, जेठ ६ गते बिहीबार जेट एयरको विमानबाट साँझपख भारतीय गुप्तचर संस्था रिसर्च एण्ड एनालाइसिसका पूर्वप्रमुख आलोक जोशी, जो नेपाल मामिलाका कुशल खेलाडीका रुपमा चिनिन्छन् र जोशीकै सहयोगी मिस्टर डी.धारिवाल काठमाडौं आएर आजभोलि सक्रियता बढाइएरहेका छन् ।
प्रतिक्रिया