काठमाडौँको मिथेन ग्यास उत्खननको काम सुरु, चिनिया टोली उत्साहित

काठमाडौं, ११ जेठ । उद्योगमन्त्री सोमप्रसाद पाण्डेयले आगामी तीन वर्षभित्र पेट्रोलियम पदार्थको खानी अध्ययन गरी उत्खनन काम सुरु हुने बताउनुभएको छ ।

मन्त्री पाण्डेयले चीनबाट आएको टोली ब्लक नं ३ को दैलेख र ब्लक नं १० मोरङको पेट्रोलियम खानीको अध्ययन गरी प्रारम्भिक नतिजाबाट उत्साहित भएको भन्दै पूर्ण प्रतिवेदन आएपछि उक्त स्थानमा ड्रिल गर्ने काम सुरु गरिने जानकारी दिनुभयो ।

ललितपुरको इमाडोल र काठमाडौँको टेकु पचलीमा मिथेन ग्यासको उत्खननको काम सुरु भएको जानकारी गराउँदै उहाँले ललितपुरको हात्तिवन र काठमाडौँको तीनकुनेको कुवामा उत्खननको काम केही दिनमा अघि बढ्ने बताउनुभयो ।

नवलपरासीको धौबादीमा १० किलोमिटर क्षेत्रमा फलाम खानी पाइएको र रामेछापको ठोसे र ललितपुरको फुल्चोकी डाँडामा पनि फलाम खानी रहेको प्रारम्भिक अनुमान रहेकाले त्यसको अनुसन्धान र उत्खननको कार्यक्रम निकट भविश्यमा नै अघि बढाउने विश्वास दिलाउनुभयो । रासस