जाजरकोट, २५ फागुन । बाह्र वर्षदेखि अलपत्र अवस्थामा रहेको छिन्चु–जाजरकोट सडकको सल्लीबजार–राकमस्थित भेरी नदीको पुल निर्माण एक महिनाभित्रै सकिने भएको छ ।
माघ महिनादेखि पुलको निर्माणले तीव्रता पाएसँगै एक महिनाभित्रै पुल निर्माण सम्पन्न हुन लागेको जानकारी दिइएको छ ।
“चैत्रभित्र काम सम्पन्न हुन्छ, वैशाखदेखि गाडी गुड्छ” – निर्माण व्यवसायी जयराम लामिछानेले भन्नुभयो ।
भेरी नदीलाई डाइभर्सन नगरेरै पुल निर्माणका लागि जडान गरेको अस्थायी बेलिब्रिजको सहायताले ४५ मिटर ट्रस्ट जडान अन्तिम चरणमा पुगेको उहाँले बताउनुभयो । त्यही ४५ मिटर भागको ढलान तथा अन्य फिनिसिङको कार्य पूरा गर्न अब एक महिना लाग्ने उहाँले बताउनुभयो । “कार्य सम्पन्न भएको हिसाबले १० प्रतिशत मात्र बाँकी रहेको छ” – उहाँले भन्नुभयो ।
एक सय ८० मिटर लम्बाइको पुल निर्माणको यो नै अन्तिम कार्य हो, निर्माण व्यवसायी लामिछानेले भन्नुभयो । पुल निर्माणका लागि दुई दर्जन मजदुरले नियमित कार्य गरिरहेको उहाँले बताउनुभयो ।
यतिबेला पुल निर्माण द्रुतगतिमा भइरहेको सडक डिभिजन सुर्खेतका इन्जिनियर दीपेश रजकले बताउनुभयो । गलत डिजाइनका कारण पुल निर्माण अलपत्र परेको थियो । दुई वर्षअघि पुलको रिडिजाइन गरेर निर्माणको काम बढाइएको थियो ।
तर गत वैशाख १२ गतेको विनाशकारी भूकम्प र मधेस आन्दोलनका कारण पुलको अन्तिम भागको निर्माणमा ढिलाइ भएको रजकले बताउनुभयो । पुल निर्माणमा अब अन्य कुनै बाधा नभएको उहाँले बताउनुभयो ।
पुल निर्माण अन्तिम चरणमा पुगेपछि जाजरकोटवासी खुसी भएका छन् । पुल निर्माणले जाजरकोटवासीको १२ वर्षको प्रतीक्षा र सास्तीको अन्त्य हुने भएको छ । साथै, यस क्षेत्रको सडक यातायात सेवा पनि नियमित हुनेभएको छ । रासस
प्रतिक्रिया