काठमाडौँ, २६ माघ । नेपाल उद्योग वाणिज्य महासङ्घले नेपाली कांँग्रेसका सभापति एवम् पूर्वप्रधानमन्त्री सुशील कोइरालाको असामयिक निधनबाट सिङ्गो निजी क्षेत्र मर्माहत भएको जनाएको छ ।
महासङ्घले आज शोक वक्तव्य जारी गरी निजी क्षेत्रका हिमायती कोइराला मुलुकको आर्थिक विकासका लागि सदा चिन्तित हुनुहुन्थ्यो भनेको छ । नेपालको राजनीतिक इतिहास र लोकतान्त्रिक आन्दोलनमा नेतृत्वदायी भूमिकामा रहेर असाधारण योगदान पु¥याउनुभएका कोइरालाको निधनबाट मुलुकलाई अपूरणीय क्षति भएको बताउँदै महासङ्घले मुलुकको आर्थिक विकासमा लाग्न निजी क्षेत्रलाई सदैव प्रेरित गर्ने व्यक्ति देशले गुमाएको जनाएको छ ।
एकता, सहमति, सहकार्य र मेलमिलापको राजनीतिमा सदा जोड दिँदै आउनुभएका कोइराला त्यसैलाई अनुसरण गरी मुलुकलाई अगाडि बढाउनुपर्नेमा सदैव लाग्नुभएको स्मरण गर्दै महासङ्घले संविधान जारी गर्न उहाँले निर्वाह गर्नुभएको भूमिकाको उच्च प्रशंसा गरेको छ ।
महासङ्घले संविधानलाई प्रभावकारी रुपमा कार्यान्वयन गर्ने जिम्मेवारी अब राजनीतिक दलका शीर्ष नेताको काँधमा आएको र त्यसलाई समयमै जिम्मेवारीपूर्वक सम्पन्न गरी राष्ट्रलाई समृद्ध बनाउने नेता कोइरालाको सपना साकार पार्न प्रमुख राजनीतिक दलका नेतालाई आह्वान गरेको छ ।
महासङ्घले स्व कोइरालाप्रति श्रद्धाञ्जलि अर्पण गर्दै शोकसन्तप्त परिवारप्रति समवेदना व्यक्त गरेको छ । रासस
प्रतिक्रिया