सोलुखुम्बु, १५ माघ । तपाईं पत्रकार हैन ? सल्लेरीमा भेटिएका एक युवकले एक्कासि सोधे । संवाददाताले हो, किन ? भनेपछि उनले भने, “म नागरिकता बनाउन गएको ज्याकेट पनि पाएँ, यसको समाचार लेखिदिनु न ।”
संवाददातालाई लाग्यो भूकम्पपीडितलाई ज्याकेट बाँडेको रहेछ क्यारे । तपाईं भूकम्पपीडित हो भनेर सोध्दा उनले भने, “भूकम्पपीडित त हो तर पीडित भनेर दिएको हैन मलाई त प्रशासनमा म्याडमले दिनुभएको हो ।”
चासो लागेर सोध्दा काँगेल–४ सोलुखुम्बु निवासी नगेन्द्र सुन्दास नाम गरेका उनी हिजो बिहीबार नागरिकता बनाउन जिल्ला प्रशासन कार्यालय गएका रहेछन् । नागरिकताको आवेदन लिएर शाखा अधिकृत सिर्जना तिवारीको अगाडि पुग्दा जाडोले काँप्न थालेछन् । शाखा अधिकृत तिवारीले डर लाग्यो भनेर सोध्दा हैन जाडो भयो भनेपछि नागरिकता बनाइदिनुभन्दा पहिले नजिकैको पसलमा गएर ज्याकेट किनेर दिनुभएछ र उनले लगाएपछि मात्र नागरिकता बनाई दिनुभएछ ।
बजारमा भेटिएका ती युवक यति खुसी थिए कि उनी बारम्बार शाखा अधिकृत तिवारीको चर्चा गरिरहेका थिए । “कति राम्रो कर्मचारी, सबैलाई मीठो बोल्ने, गाली पनि नगर्ने, सजिलोसँग सोध्ने, सबै कर्मचारी यसै हुनु नि”, ती युवकले संवाददातासँग भने ।
नागरिकता बनाउन आफ्नो कार्यालयमा आएको बेलामा चिसोले काँपिरहेको देख्दा माया लागेर ज्याकेट किनिदिएको शाखा अधिकृत तिवारीले बताउनुभयो । लगातार चार दिनदेखि मौसम खराब हुँदा हिजो सल्लेरीमा अत्यधिक चिसो थियो । यस्तो बेलामा सामान्य कपडा लगाएर आएकाले ज्याकेट किनिदिएको बताउने शाअ तिवारीले दुःख देख्न नसकेर सोलुखुम्बुमा काम गर्न थालेका ६ महिनाको यो अवधिमा यसअघि पनि दुईजनालाई सहयोग गरेको र अन्य जिल्लामा पनि समस्यामा परेर आएका सेवाग्राहीलाई नगद तथा जिन्सी सहयोग गरेको बताउनुभयो । रासस
प्रतिक्रिया