काठमाडौं, १९ पुस । शनिबार राति भएको खेलमा स्पेनिस क्लब बार्सिलोना बराबरीमा रोकिदा एथ्लेटिक मड्रिडको भाग्य चम्किएको छ ।
लिगको पुछारमा रहेको लेभान्टेलाई पराजित गर्दै एथ्लेटिको २ अंकको अग्रतासहित ला लिगाको शीर्ष स्थानमा उक्लेको हो ।
एथ्लेटिकोका लागि सब्सिटिच्युड थोमस पार्टेले खेलको ८१ औं मिनेटमा गोल गर्दै एथ्लेटिकोलाई महत्वपूर्ण तीन अंक दिलाए । एथ्लेटिकोको १८ खेलबाट ४१ अंक रहेको छ ।
यद्यपि, बार्सिलोनाले एक खेल कम खेलेको छ । उता, बार्सिलोनाले भने सन् २०१६ को शुरुवात बराबरीबाट गरेको छ । लुइस एन्रिकेको टोलीले सन् २०१५ मा १ सय ८० गोल गर्दै ५ वटा ट्रफी जितेपनि शनिबार एस्पानियोलविरुद्धको खेलमा भने सन्तोषजनक प्रदर्शन गर्न सकेन ।
एस्पानियोलका गोलकिपर पाउ लोपेजले मात्र दुई वटा बचाउ गर्नु परेको थियो । लुइस सुवारेज र लियोनेल मेस्सीको प्रयास पोष्टमा लागेको थियो ।
खेल बराबरी हुँदा शीर्ष स्थान रहेको बार्सिलोना एक स्थान तल झर्यो ।
प्रतिक्रिया