काठमाडौं, ८ पुस । प्रधानमन्त्री केपी ओलीले व्यवस्थापिका संसदको बैठक चलाउनका लागि सरकारले सबै प्रकारको सहयोग गर्ने आश्वासन दिनुभएको छ ।
प्रधानमन्त्री निवास बालुवाटारमा आज बिहान सभामुख ओनसरी घर्तीसँग भएको भेटवार्ताका क्रममा ओलीले सदनलाई कसैले पनि अबरोध गर्न नहुने बताउनुभएको हो ।
‘संसद अबरोध गर्नु हुँदैन । संसदमा धेरै महत्वपूर्ण विषय पारित गरेर जानुपर्ने अवस्था छ’, प्रधानमन्त्री ओलीको भनाइ उदृत गर्दै सभामुख घर्तीका प्रेस सल्लाहकार बबिन शर्माले भन्नुभयो, ‘सरकारले अगाडि बढाउन चाहेका कानुन र ऐनसम्बन्धी विधेयकमा सबैको सहयोगका विषयमा छलफल भएको हो ।’
सभामुख घर्तीले पनि मधेसी मोर्चाको संसद अबरोधका विषयमा प्रधानमन्त्री ओलीको ध्यानाकर्षण गराउनुभएको थियो ।
जवाफमा ओलीले मधेसी मोर्चासँग औपचारिक र अनौपचारिक कुराकानी हुँदै आएको भन्दै छिट्टै मुलुकले निकास पाउने उल्लेख गर्नुभएको थियो ।
प्रतिक्रिया