सरकार र मधेसी मोर्चाबीच सकारात्मक वार्ता, के-के भयो ?

काठमाडौं, ६ पुस । सोमबार दिउँसो सरकार र आन्दोलनरत मधेसी मोर्चाबीच अनौपचारिक रुपमा आकस्मिक वार्ता भएको छ ।

परराष्ट्र मन्त्रालयमा भएको वार्तामा मधेस आन्दोलनबारे आइतबार सरकारले गरेका निर्णयमा छलफल भएको छ । सरकारी वार्ता टोली संयोजक उपप्रधान तथा परराष्ट्रमन्त्री कमल थापाले आइतबार मन्त्रिपरिषद्ले गरेको निर्णय मोर्चालाई जानकारी गराउनुभयो ।

यसैगरी आगामी वार्ता कसरी निर्णायक बनाउने भन्नेबारे दुवै पक्षबीच अनौपचारिक छलफल भएको परराष्ट्रमन्त्री थापाले बताउनुभयो । ‘सकारात्मक वार्ता भएको छ । अबको अर्काे वार्ता निर्णायक हुन्छ’ उहाँले भन्नुभयो ।

वार्तामा मोर्चा नेताहरु सर्वेन्द्रनाथ शुक्ल, लक्ष्मणलाल कर्ण लगायत सहभागी थिए । सरकारका तर्फबाट परराष्ट्रमन्त्री सहभागी थिए । यसअघि हिजो सरकारले मधेस आन्दोलनका माग सम्बोधन गर्न चारवटा निर्णय गरेको थियो ।