काठमाडौं, २७ मंसिर । सदभावना पार्टीका अध्यक्ष राजेन्द्र महतोको अभिव्यक्तिलाई लिएर नेपाल परिवार दलले आपत्ति जनाएको छ ।
हाल भारत भ्रमण रहेका महतोले नयाँ दिल्लीस्थित जवाहरलाल नेहरु विश्वविद्यालय (जेएनयू)मा तराई मधेस स्टडी ग्रुपले आयोजना गरेका अन्तरक्रिया कार्यक्रममा मधेस आन्दोलन सफल नभए नेपालबाट मधेस अलग हुनसक्ने बताएका थिए ।
उक्त भनाईमा आपत्ति जनाउँदै सोमबार परिवार दलका अध्यक्ष एकनाथ ढकालले विज्ञप्ति जारी गरेर नेपालको सार्बभौम सत्ता र राष्ट्रिय अखण्डताविरुद्ध देश बिखन्डन गर्ने प्रकारको गैर जिम्मेवार अभिव्यक्ति नदिन महतोलाई चेतावनी समेत दिएको छ ।
‘तराई मधेसको आन्दोलन नितान्त नेपालको आन्तरिक मामिला हो र यसको जायज मागहरु सम्बोधन गर्नु नेपाल सरकारको दायित्व हो । उत्तेजना र आबेगमा आयर आफ्नो मातृभूमि माथि धावा बोल्ने अधिकार कसैमा पनि छैन ।’ विज्ञप्तिमा भनिएको छ ।
यस्ता अराजक अभिव्यक्तिले सिंगो आन्दोलन लाइ नै अराजक बनाउन सक्ने भएकाले तराई मधेसका सम्पूर्ण नेपाली नागरिकहरुलाई सजग रहन र शान्ति पूर्ण तरिकाले आफ्ना हक र अधिकारको लागि लड्न परिवार दलले आग्रह समेत गरेको छ ।
‘विनाशकारी भूकम्प, ३ महिना भन्दा लामो आन्दोलन र नाकाबन्दीले सिथिल भएको मुलुकमा समस्या समाधानको नया आशा पलायाको बेला कसैले पनि परिस्थिति भड्काउने प्रकारको गतिबिधि नगर्न र देश भित्रै निकास खोज्न नेपाल परिवार दल आग्रह गर्दछ ।’ विज्ञप्तिमा उल्लेख छ ।
प्रतिक्रिया