राजनीतिक विषयमै प्रवेश नगरी सकियो त्रिपक्षीय वार्ता, कांग्रेस र मधेसी मोर्चाबीच चर्काचर्की

काठमाडौं, २७ मंसिर । सरकार, प्रतिपक्षी दल नेपाली कांग्रेस र आन्दोलनरत मधेसी मोर्चाबीच भएको आजको वार्ता पनि राजनीतिक विषयमै प्रवेश नगरी निष्कर्षविहिन बनेको छ ।

प्रतिपक्षी कांग्रेस र आन्दोलनरत मधेसी मोर्चाले आफ्नो अडान नछाडेपछि वार्ता निष्कर्षविहिन बनेको एमाओवादी उपाध्यक्ष नारायणकाजी श्रेष्ठले जानकारी दिनुभयो । उहाँले भन्नुभयो– कांग्रेस र मधेसी मोर्चाको अडानले वार्तामा राजनीतिक विषयनै प्रवेश भएन् ।
बैठकमा कांग्रेसले संविधान संशोधन प्रस्ताव र पुनर्निर्माण प्राधिरकण विधेयक संगसंगै अगाडि बढाउनुपर्ने अडान राखेको थियो भने, मोर्चाले पुननिर्माण प्राधिकरणमात्रै अगाडि बढाउने तर, संशोधन प्रस्ताव अगाडि बढ्न नदिने अडान राखेपछि वार्ता निष्कर्षविहिन बन्यो ।

आजको वार्तामा मधेस आन्दोलन र भारतको नाकाबन्दीले प्रवेशै पाएनन् । कांग्रेस मोर्चाको चर्काचर्कीपछि वार्ता स्थगित गरियो । वार्तापछि मोर्चाका नेता लक्ष्मणलाल कर्णले वार्तामाा कुनै विषयमा छलफल नभएको बताए । उनले मधेसका माग पुरा गर्न सरकार र कांग्रेसले नचाँहेको आरोप लगाए ।