प्रजातन्त्रवादी नेत्री सुकीलाई सुशील कोइरालाको बधाई

काठमाडौँ, २७ कात्तिक । नेपाली काँग्रेसका सभापति सुशील कोइरालाले म्यान्माको आमनिर्वाचनमा त्यहाँको नेसनल लिग फर डेमोक्रेसीले भारी बहुमतले विजय हासिल गरेकामा पार्टी नेत्री आङ सान सुकीलाई बधाई सन्देश पठाउनुभएको छ ।

सन्देशमा व्यवस्थापिका–संसद्का विपक्षी नेता कोइरालाले बिपी कोइरालाको जन्मशताब्दीका अवसरमा नेत्री सुकीले नेपालमा गरेको भ्रमणको स्मरणका साथ उहाँको प्रजातन्त्र र मानवताप्रतिको अटल विश्वासमा आफूहरु पनि सहभागी भएको बताउँदै उहाँको नेतृत्वलाई भारी जनादेश प्राप्त हुनुले प्रजातन्त्रप्रतिको साझा प्रतिबद्धतालाई दर्साउँछ भन्नुभएको छ ।

उहाँले राष्ट्रिय एकता र मेलमिलापलाई अगाडि बढाउने उहाँको लक्ष्यप्रति शुभकामना व्यक्त गर्दै म्यान्माली जनताले देखाएको साहस र प्रतिबद्धताको प्रशंसा पनि गर्नुभएको छ । रासस