काठमाडौं, १३ कात्तिक । राष्ट्रपति विद्यादेवी भण्डारीले सपथ लिएको दिन बिहीबार राष्ट्रपति भवन शीतल निवासमा गज्जबको दृश्य देखियो ।
भारतले एकातिर नेपालमा अघोषित नाकाबन्दी गरी संविधान संशोधन गर्न दबाब दिइरहेको छ । अर्कोतिर भारतीय अधिकारीहरु नेपालमा आफ्नो पदीय मर्यादा समेत नाघ्न थालेका छन् । हो, यस्तै दृश्य देखियो शीतल निवासमा बिहीबार।
नवनिर्वाचित राष्ट्रपति भण्डारीको सपथ ग्रहण सकिएपछि निर्वतमान राष्ट्रपति रामवरण यादवको विदाइ कार्यक्रम चलिरहेको थियो । त्यहाँ नेपालस्थित विभिन्न देशका राजदूत पनि उपस्थित थिए । नेपालका लागि भारतीय राजदूत रन्जित रे पनि सहभागी भएका थिए ।
सुरुमा राष्ट्रपति भण्डारीसामू परिचय गर्दा पनि मर्यादाको ख्याल नगरेका रेले निवर्तमान राष्ट्रपति यादवको विदाईका लागि शीतल निवासको प्रभास हलमा भएको समारोहमा भित्र पस्न खोज्दा पनि सीमा नाघे ।
साँझ भएको यादवको विदाई समारोहमा जानुअघि भवनको मूल प्रवेशद्वारमा रेले नेपालका प्रधानसेनापति राजेन्द्र क्षेत्रीसँग कुराकानी गरेका थिए । त्यसपछि उनी मर्यादाका पुरै सीमा नाघेर मूल प्रवेशद्वारबाटै भित्र पस्न खोजे । तर, त्यहाँ खटिएका नेपाली सेनाका अधिकारीले उनलाई रोके । र, बाहिर पठाएर अर्को प्रवेशद्धारबाट भित्र पस्न आग्रह गरे ।
नेपालमा आफ्नो कुटनीतिक मर्यादा भुल्ने भारतीय राजदूतलाई बिहीबार भने नेपाली सेनाका सकल दर्जाले सबक सिकाइदिए । मुख्य ढोकाबाट छिर्न नपाएपछि उनी कालोनिलो हुँदै फर्किएका थिए ।
प्रतिक्रिया