चिउरीखर्कमा जीप दुर्घटना, तीन यात्रुको मृत्यु

वालिङ, ५ कात्तिक । स्याङजाको खिलुङ देउराली गाविस–६ चिउरीखर्कमा भएको जीप दुर्घटनामा तीनजनाको ज्यान गएको छ ।

खिलुङ कालिका मन्दिरको दर्शन गरेर फर्कने क्रममा बुधबार ग १ ज ५९८५ नम्बरको जीप दुर्घटना भएको हो ।

वडा प्रहरी कार्यालय वालिङका प्रहरी निरीक्षक विजयराज पण्डितका अनुसार दुर्घटनामा ज्यान गुमाउनेमा खिलुङ देउराली–३ का हुमबहादुर रोका, स्वरेक–७ का मनिषा रोका र दार्सिङ दहथुम गाविस–९ का तुल्सी केसी रहेका छन् ।

जीपमा १० जना सवारमध्ये तीनजना सामान्य घाइते भएका छन् । उनीहरुलाई उपचारका लागि जिल्ला अस्पताल लगिएको छ । कच्ची सडकमा ब्रेक फेल भएर उक्त दुर्घटना भएको वडा प्रहरी कार्यालयले जनाएको छ ।