असन्तुष्ट मधेसी र थारुका माग सम्बोधन गर्न वार्ता समिति गठन, को-को छन् सदस्य ?

काठमाडौं, ११ असोज । नयाँ संविधानमा असन्तुष्टि जनाउँदै आन्दोलनमा रहेका मधेसी र थारु समुदायको माग पूरा गर्न वार्ता समिति गठन गरिएको छ ।

प्रधानमन्त्री निवास बालुवाटारमा सोमबार विहान बसेको प्रमुख तीन दलका शीर्ष नेताहरुको बैठकले असन्तुष्ट मधेसी र थारु समुदायका माग सम्बोधन गर्न वनमन्त्री महेश आचार्यको संयोजकत्वमा तीन सदस्यी वार्ता समिति गठन गरेको बैठकमा सहभागी कांग्रेसका उपसभापति रामचन्द्र पौडेलले जानकारी दिनुभयो ।

उहाँले भन्नुभयो- ‘बैठकमा आन्दोलनमा रहेका मधेसी र थारु लगायत असन्तुष्ट पक्षसँग सम्पर्क गरी जायज माग सम्बोधन गर्न तीन सदस्यीय वार्ता टोली गठन गरिएको छ । समितिले वाताको वातावरण बनाएर माग सम्बोधनमा पहल गर्छ ।’

समितिमा कांग्रेसबाट वनमन्त्री महेश आचार्य, एमालेबाट प्रमुख सचेतक अग्नी खरेल र एकीकृत नेकपा माओवादीबाट एक जना रहेका छन् । समितिमा माओवादीबाट को बस्ने भन्ने बारे टुङ्गो लागिसकेको छैन् ।