काठमाडौं, ८ असोज । नेपालका लागि भारतीय राजदूत रञ्जीत रेले नेकपा एमालेका अध्यक्ष केपी शर्मा ओलीसँग भेटवार्ता गरेका छन् ।
ओली निवास बालकोटमा शुक्रबार भएको गोप्य भेटवार्तामा करिब एक घण्टा छलफल भएको थियो । भारतले नाकाबन्दी गरेको विषयमा नेपाल सरकारले स्पष्टिकरण सोध्ने तयारी गरिरहँदा भारतीय राजदूत रेले अध्यक्ष ओलीलाई भेटेका हुन् ।
भेटमा ओलीले भारतले सीमानामा नाकाबन्दी गरेकोबारे राजदूतसँग चासो राखेको बालकोट स्रोतले जनाएको छ । जवाफमा भारतीय राजदूत रेले नेपालकै तर्फबाट सीमानाकामा अवरोध भएको भन्दै राजनीतिक समस्या भएकाले राजनीतिक नेतृत्वले यसलाई समाधान गर्नुपर्ने बताए । राजदूतको जवाफपछि अध्यक्ष ओलीले भारतले नाकाबन्दी गरिहाल्नुपर्ने गरी हामीले कुनै गलत काम नगरेको बताएका थिए ।
भावी प्रधानमन्त्रीका रुपमा हेरिएका ओलीलाई भेट्न भारतीय राजदूत राय शुक्रबार बिहान ओली निवास पुगेका थिए । नेपालमा संविधान जारी भएपछि भारत असन्तुष्ट छ ।
प्रतिक्रिया