काठमाडौं, ४ भदौं । उच्चस्तरीय राजनीतिक विशेष समितिले सात प्रदेशको संघीय नेपाल बनाउने निर्णय गरेसँगै चार जिल्ला टुक्र्एिका छन् । सात प्रदेशको नयाँ सीमांकनमा नेपालका रुकुम, बाग्लुङ, नवलपरासी र पर्सा जिल्लाका केही भाग टुक्रिएका हुन् ।
२ नम्बर प्रदेशमा पर्ने पर्सा जिल्लाको ठोरी गाविस र केही भाग तीन नम्बर प्रदेशमा राखिएको छ । नवलपरासी जिल्लाको दाउन्ने पूर्वको भागलाई छुट्याएर ४ नम्बर प्रदेशमा राखिएको छ ।
परासी बजारसहितको पश्चिमको भाग प्रदेश नम्बर ५ मा राखिएको छ । ४ नम्बर प्रदेशमा राखिएको नवलपरासीको पूर्वी भागले ४ नम्बर प्रदेशलाई भारतसँग जोड्छ ।
त्यस्तै बाग्लुङ जिल्लालाई पनि लगभग आधा पारेर पूर्वी भाग ४ नम्बरमा प्रदेशमा र पश्चिमी भाग ५ नम्बर प्रदेशमा राखिएको छ ।
मध्यपश्चिमको पहाडी जिल्ला रुकुमलाई टुक्राएर मगर बाहुल्य रहेको पूर्वको आधा भाग ५ नम्बर प्रदेशमा राखिएको छ भने आधा भाग नयाँ बनाइएको सल्यानसहितको भेरी र कर्णाली अञ्चलका जिल्लाहरुको ६ नम्बर प्रदेशमा राखिएको छ ।
विशेष समितिको आजको बैठकले ६ प्रदेशको सीमांकनलाई परिमार्जन गर्दै सात प्रदेशको संघीय नेपाल बनाउने निर्णय गरेका थिए ।
प्रतिक्रिया