काठमाडौँ नजिकै केन्द्रबिन्दु बनाएर भूकम्पको धक्का (अपडेट)

काठमाडौँ, १० असार । नेपालमा बिहीबार राति फेरि भूकम्पको धक्का महसुस गरिएको छ ।

बिहीबार राति ९ बजेर ७ मिनेट जाँदा नुवाकोटलाई केन्द्रबिन्दु बनाएर ४.३ रेक्टर स्केलको पराकम्प गएको हो । भूकम्प मापन केन्द्रका प्रमुख लोकविजय अधिकारीका अनुसार, भूकम्पको केन्द्रबिन्दु काठमाडौँबाट १५ किलोमिटर उत्तरपश्चिम र नुवाकोटको विदुर नगरपालिकाबाट १२ किलोमिटर दक्षिण रहेको थियो । काठमाडौँबाट नजिकै केन्द्रबिन्दु रहेका कारण काठमाडौँमा धक्का महसुस गरिएको हो । भूकम्प गएपछि कहीँ कहीँ काठमाडौँका बासिन्दा पनि घरबाहिर निस्केका छन् ।

नुवाकोट सहकर्मी भोला पौडेलका अनुसार, नुवाकोट सदरमुकाम विदुरमा भने भूकम्पको कडा नै धक्का महसुस गरिएको थियो । भूकम्पपछि विदुरका बासिन्दा अहिले घरबाहिर निस्केका छन् ।

यसअघि बुधबार दिउँसो सिन्धुपाल्चोकलाई केन्द्रबिन्दु बनाएर ४ रेक्टर स्केलको भूकम्प गएको थियो ।