बार्सिलोना बराबरीमा रोकिदा रियलको सहज जित, उपाधि भिड्न्त रोनाल्डो र मेस्सीको हातमा

काठमाडौं, २९ चैत । स्पेनिस ला लिगाको अन्तिम चरणका खेलमा निकै प्रतिस्पर्धा देखिएको छ । विश्व फुटबल स्टार क्रिस्टियानो रोनाल्डोको रियल मड्रिडलाई पछ्याएर लिग लिडर बनेको लियोनल मेस्सीको बार्सिलोनालाई शनिवार रातिको खेलमा झट्का लागेको छ ।

बार्सिलोनाले हिजो रातिको खेलमा बराबरी खेलेपछि रियलले सहज जित हात पारेको छ । शनिबार राति भएको खेलमा लिग लिडर बार्सिलोना सेभिल्लासँग २-२ को बराबरीमा रोकिँदा रियल मड्रिडले एइबरलाई ३-० ले पराजित गरेको थियो ।

सेभिल्लासँग घरेलु मैदानमा बराबरी खेलेको बार्सिलोनाले खेलमा २-० को अग्रता जोगाउन सकेन । बार्सिलोनाले १४ औं मिनेटमा लिओनल मेस्सीको गोलबाट अग्रता लियो । ३१ औं मिनेटमा नेयमारले गोल गर्दै अग्रता दोब्बर पारे ।

तर, ३८ औं मिनेटमा बनेगाले गोल गर्दै सेभिल्लालाई खेलमा फर्काउने संकेत दिए । ८४ औं मिनेटमा गमेइरोले गोल गरेपछि सेभिल्ला लिग लिडर बार्सिलानालाई बराबरीमा रोक्दै अंक खोस्यो । सेभिल्लाले अंक खोसेपछि बार्सिलोनालाई झट्का लागेको छ ।

यस्तै, अर्को खेलमा रियल मड्रिडले एइबरमाथि ३-० को सहज जित हात पार्‍यो । रियलका लागि रोनाल्डोले २१ औं मिनेटमा सुरुवाती गोल गरे । ३१ औं मिनेटमा हर्नान्डेजले गोल गरे भने ८३ औं मिनेटमा जोसेले गोल गरे ।

जितपछि रियल मड्रिडको ३१ खेलबाट ७३ अंक भएको छ र बार्सिलोनाभन्दा २ अंकले मात्र पछि छ । लिग लिडर बार्सिलोनाको ७५ अंक छ । जितसँगै रियलले बार्सिलोनासँगको अंक दुरी २ मा झारेर उपाधि होडमा फर्किएको छ ।